Sama sa naandan, si Joavan

Sama sa naandan, gipasanginlan na sab si Joavan Fernandez, sinagop ni Talisay City Mayor Soc Fernandez, nga namusil niadtong Biyernes sa kadlawon. Sama sa naandan, wa na sab siya madakpi sa kapolisan. Sama sa naandan napakyas na sab ang mga polis pagtultol sa iyang tagoanan.

Sama sa naandan, gipalapdan sa kapolisan ang manhunt batok ni Joavan. Sama sa naandan, nanganti ang mga polis nga mopasaka og kaso batok ni Joavan. Sama sa naandan, way kaso nga mapasaka. O kon duna man di motunhay. Kay sama sa naandan maareglo na sab ang biktima.

***

Sama sa naandan, mopasalig si Mayor Fernandez pagsusi sa labing uwahing pasangil batok sa iyang sinagop. Sama sa naandan, mamalibad siya nga way kasayuran hain mahimutang ron si Joavan. Sama sa naandan, mangangkon si Fernandez nga nagkasulti sila sa telepono ug kusganong ipanghimakak ni Joavan ang pasangil batok niya.

Sama sa naandan, di igkita si Joavan ug way mahitabo sa kaso sa mosunod nga pipila ka adlaw. Sama sa naandan madapit ang atensiyon sa publiko sa mas bag-ong mga eskandalo. Sama sa naandan, ang sunod nga madunggan sa mga Sugbuanon mao na lang nga di na interesado ang biktima ug busa way kasong mapasaka ang kapolisan batok ni Joavan.

***

Sama sa naandan, mopadayag og kasubo ang kapolisan nga nahudlat o nahaylo na sab ang biktima ni Joavan. Sama sa naandan, moawhag ang kapolisan sa taga Talisay sa pagtabang pagbantay sa kalihokan ni Joavan. Sama sa naandan, pasidan-an nila si Joavan sa di na pagpabadlong pag-usab kay tinud-on na gyud siya sa sunod nga higayon.

Sama sa naandan, mosaad si Fernandez nga iyang maymayan ang iyang sinagop. Sama sa naandan, mopasabot nga si Joavan ra ang makahukom kon mopaubos ba sa rehabilitation o dili. Sama sa naandan, mopasalig si Fernandez nga nagpakita na og mga timaan sa pagbinuotan si Joavan. Sama sa naandan, motataw sa iyang determinasyon sa padayong pagpas-an sa bug-at nga krus nga gitugyan sa Ginoo ngadto niya.

***

Sama sa naandan, mopadayag sa ilang kahimangod sa kabadlungon ni Joavan ang ubang mga politiko sa Talisay. Sama sa naandan, pipila nila mobanhaw sa awhag nga pasudlon si Joavan og rehabilitation center aron katambalan sa gituohang pagka ungo niya sa ilegal nga drugas.

Apan, sama sa naandan, way mahitabo sa ilang awhag. Sama sa naandan, bungulbungolan lang ni Joavan ug sa iyang amahan ang mga pagsaway sa nagkalainlaing sektor. Sama sa naandan, si Fernandez magpabiling alyado sa mga politiko nga nanaway ni Joavan. Sama sa naandan, si Fernandez modaog sa katungdanan nga iyang daganan. Ug busa, sama sa naandan, padayong makadupa sa iyang sinagop.

***

Email: [email protected]