Tapolan, talawan nga Comelec

Hapit na mawagtang ang akong bilib sa Commission on Elections (Comelec). Puwerteng pakpak nako pagpangisog nila og pasidaan sa mga kandidato sa di paglapas sa mga lagda sa piniliay kay mas istrikto sila karon kay sa nangaging mga piniliay. Haskang dayeg nako dihang gipadad-an sa Comelec og pormal nga notisya ang mga kandidato nga ilang nasakpan nga namutang og campaign materials gawas sa gitakda nga common poster areas.

Mas nisalig ko nga mas determinado na silang mopatuman sa balaod dihang ilang gidasig ang mga botante sa pagtabang pag-dokumento sa kalapasan pinaagi sa social media sama sa Facebook ug Twitter.

***

Apan inanayng napawong ang akong kadasig sa paghagit sa nagpakabana nga mga botante pagtabang sa Comelec. Kay duha ka buwan na human nagsugod ang campaign period sa nasudnong mga kandidato ug partylist groups, wa pay bisan usa nga nasilotan. Pipila nila napadad-an na og upat ka notisya sa ilang kalapasan, apan wa gihapoy nahitabo.

Ubos sa lagda, may tulo ka adlaw nga lugway ang mga kandidato pagtangtang sa ilegal nilang campaign materials. Kon magpaugat, pasakaan sila og kaso. Hangtod karon wa pay bisan usa nga nakiha. Nisamot akong duda dihang nikumpisal si Comelec Chairman Sixto Brillantes nga ang ilegal nga campaign materials di sukaranan pag-disqualify sa mga kandidato.

***

Wa diay kalainan sa nangagi ang kadagkoan sa Comelec karon. Bugtong nilang mga bentaha mao nga mas maayo silang mopaukyab, mas epektibo silang mopalaom ug may mga mascot pa--silang Boy Bawal, nga nanudlo unsay kalapasan sa mga lagda, ug si Tina Tama, nga nanambag unsay tukma nga mga paagi sa pagpangampanya.

Maong di mabasol ang lokal nga mga opisyal sa Comelec. Nga hangtod karon, kapin na sa semana human nagsugod ang campaign period sa lokal nga mga kandidato, wa pa silay napadad-an og notisya. Sama sa ilang mga labaw sa kaulohan, kutob ra sila sa pagarpar.

***

Kay bisan unsaon nila pagtinuod ang kampanya batok sa kalapasan sa mga lagda sa kampanya, ang lokal nga kadagkoan sa Comelec nahibawo nga masangit ra gihapon sa ilang ulohang buhatan. Sa laktod, way mahitabo kon gukdon gyong mga kandidato nga nagpapating sa pagpamintaha sa kampanya.

Ang segurong mahitabo mao nga mabawosan ang election officers kon ang ang gibadlong nilang mga politiko maoy modaog sa umaabot nga piniliay. Nga inay gantihan sa ilang kakugi ug kaisog pagpatuman sa mga lagda mahimong malabay na hinuon sa Maguindanao. Maong kasagaran nila nangiyugpos na lang atubangan sa nagkalata nga kalapasan sa kampanya. Kay nabantang mang katapolan ug katalawan sa Comelec, pun-an pa nga hapit tanang kandidato ang nakalapas, ang mga botante mapugos pagdawat nga way anghel ning gikaintapang duwa sa yawa.

***

Email: [email protected]