Masiao ug shabu

Mora'g gilisuran tingali pagtubag ang abogado ni Konsehal Rodrigo Abellanosa sa reklamo nga gipasaka ni Atty. Aristotle “Totol” Batuhan kay dugay man siya nakatubag.

Nasayran ni Atty. Batuhan nga mihangyo diay si Abellanosa, pinaagi sa iyang abogado, nga hatagan siya'g lugway pagtubag sa kaso nga gipasaka batok kaniya sa iyang kaatbang sa politika.

Mao tingali nga dili na gayud ganahan si Abellanosa nga motubag nako. Amigo man unta nako kini si Abellanosa apan nausab man abi kay mosuwat ko sa reklamo ni Totol.

Unsa man diay gusto nimo Sir, dili na lang nako tagdon ang isyu nga gipasaka batok nimo? Dili 'sab tingali maayo uy. Ang tukma, tubaga lang ang reklamo ni Totol nga gisang-at didto sa Malacañang.

Mao diay tingali nga bisan giunsa nako pag-text ni Abellanosa kay mangayo ko'g kopya sa iyang tubag sa reklamo ni Totol, dili gayud motubag kay wala pa tingali siya maka-reply.

Gipasanginlan man gud ni si Abellanosa nga nakalapas sa balaod kay ang iyang tunghaan midawat man og daghang scholars, sa ato pa nakabinepisyo siya sa Scholarship Program, ug matud ni Totol nakalapas si Abellanosa sa lagda sa Code of Conduct and Ethical Standards for Public Officials and Employees.

Tan-aw nako, kon dili nimo tubagon dayon ang isyu basin ang mga botante magtoo g'yud nga nakahimo ka'g kasaypanan ug dili na sila ganahan nimo.

* * *

Uy, dunay konsehal sa usa ka lungsod dinhi sa Sugbo nga financier og masiao. Hala ka konsehal, nahibaw-an ka na g'yud. Ang iyang operation center naa pa sa bukid.

Sama ra usab kini sa kapitan sa barangay diha sa Danao nga nag-finance usab og masiao. Wala g'yud ni aksyoni sa atong mga polis diha.

Palihog, CPPO director Pat Comendador mahimoi kini og aksyon sa mga sakop sa Provincial Intelligence Branch kay nasayud kana, hadlok kaayo ang mga polis diha sa Danao kay inpluwensyado kaayo kining maong kapitan.

Huwata nga madakpan mo sa mga polis kapitan ug ikaw nga konsehal sa lungsod kon dili kamo mohunong. Gihatagan ko sa akong informer og ngalan sa maong konsehal ug kapitan.

Unya, diha sa Barangay Pulpogan, Consolacion wala pa mahurot ang drug pusher nga ilado kaayo. Nakaila ba kamo aning “Boyet?” Sagdi lang, moabot ra ang inyong adlaw.

Sa Looc, Danao duna 'say gihulagway nga druglord nga wala man hilabti sa mga polis! Ngano man ni, amigo ninyo? Ang angga niini nga druglord nagsugod sa letra nga “B.”

* * *

Epektibo kaayo nga modawat ko'g inpormasyon sa katawhan kay sila man ang nahibalo. Apan kon sensitibo na ang inpormasyon, dili dayon nako ipublikar kay ako pa nga himoan og follow-up.

Sari-sari lang ang reklamo nga akong madawat. Dunay uban nga nagreklamo sa ilang “employers” apan gitambagan nako nga mohimo sila og “formal complaint.”

Ayaw kamo pagtinalawan uy kay dili kana maayo. Barugi ang inyong katungod, dili kay moreklamo kay mangayo'g tabang apan nag-ukon-ukon. Dili ko motagad nianang maong reklamo.

** *

Uy, kinsa man kining tanod sa Tejero nga gireport nga magsige gihapon og dala-dala'g armas bisan og gunban. “S” kuno ang sinugdanan sa apelyido niining maong tanod. Ayaw'g abuso uy.

Gunban intawon karon uy, tahora usab ninyo ang balaod. Buyno, kon giisip ninyo nga kinahanglan g'yud nga magdala mo'g armas bisan illegal, ayaw ipasaya-saya, kay ang armas dili panghambog!

Diha sa T. Villa, panid-i ra gud ninyo kining balay sa usa ka “Otik” kay nakadawat ko'g report nga dunay daghang moanha diha sa mga tawo nga ilado kaayo nga manuyopay og shabu.

Mga polis ug tanod kuno nga makakita diha magtan-aw ra man. Unsa ni katinuod?

Unya, ang barangay clearance kuno diha sa Jagobiao, Mandaue tag P100 man ang bayad. Aw, tan-awa kon pila ang ibutang sa resibo. Kon P100 ang ilang ibutang sa resibo, walay problema basta duna silay ordinansa sa barangay nga nagtugot sa maong koleksyon.

Kon may reklamo kamo, ari lang i-text sa 0933-570-0853 pero og dili Sun, usahay dili lang ko mo-reply kay dalia ra mahurot sa akong load uy, tag kapin sa 100 ka text akong madawat sa usa ka adlaw.