Masyaw gipasagdan ra

Gibutyag sa kanhi financier sa sugal nga masyaw dinhi sa Sugbo - Randy Bulibuli - nga daghan pa gihapon ang nagpadayon sa pag-operate og illegal nga sugal. Tingali nagpaabot nga madakpan o kaha sobra pa.

 Nagtoo ko nga may basihanan ang kabalaka ni Bulibuli nga adunay mga tawo karon nga mihimo na og estrikto nga kampanya batok sa mga nalambigit pag-operate og masyaw.

Mora'g tinuod nga may mga armadong tawo nga misugod na paghimo'g hugtanay nga kampanya batok sa mga financier og masyaw. Una, ang ganghaan sa balay ni Bulibuli diha sa Barangay Pasil girakrakan og mga bala kaniadtong kaadlawon sa Enero 30.

Ang pagrakrak og mga bala sa “gate” sa balay ni Bulibuli gihimo kay wala man siya mohunong pag-finance og masyaw bisan og gipadad-an na siya og paskin. Kini maoy nakaaghat ni Bulibuli nga makigtagbo dayon ni Police Regional Director Marcelo Garbo ug mipahibalo nga moundang na siya sa illegal nga kalihukan.

Wala masayup si Bulibuli sa iyang katahap nga dili na komedya ang hulga kay si Edgar Lim kinsa matud sa kapolisan nag-finance usab og masyaw gibanhigan ug gipusil sa miaging semana. Hangtod karon naa pa gani si Lim sa ospital.

Ang mga report nga akong nadawat gikan sa mga magbabasa sa akong lindog sa Freeman ug Banat News nagbutyag nga ang masyaw padayong wala masumpo dili lang dinhi sa dakbayan, kon dili apil na sa ubang bahin sa rehiyon.

* * *

Kon estrikto pa unta nga gipatuman sa kapolisan ang balaod nga nagpausbaw sa silot sa mga madakpan ug makonbikto sa illegal nga sugal, ilabi na ang masyaw, tingali mahadlok g'yud ang financier.

Ang Republic Act 9287 dako kaayo og silot niadtong mamatud-an nga sad-an apan nganong ang ipasaka nila nga kaso kadto man nga balaod nga ubos ra ang silot?

Kinsa go'y dili mahadlok nga kon ipatuman gayud ang Republic Act 9287 nga namugna kaniadto pa'ng 2004, ang financier sa masyaw multahan man og tulo ngadto sa lima ka milyon ka pesos.

Ang mga report nga akong nadawat nagkanayon nga ang kapolisan, ilabi na didto sa kalungsoran, maglingiw-lingiw lang kon may mga usher nga mangisyu og tiket sa masyaw. Tarung ba gud na?     

Ang dakbayan sa Sugbo dunay City Ordinance 1616 nga mosilot sa mo-imprinta, mobaligya, moapud-apod ug maghupot sa tipsheets sa masyaw, apan gipatuman ba gud kini? Dili ko kombinsido sa baruganan ni Mayor Michael Rama nga dili niya priority ang illegal nga sugal.

Ang Section 63 sa Republic Act 8551 naglatid g'yud nga “the control and supervision of anti-gambling operations shall be within the jurisdiction of local government executives.”

* * *

 Kadtong tag-iya og sakyanan nga namasangil nga miabuso ang mga sakop sa Land Transportation Office (LTO) dihang gidakop ang iyang Hyundai Starex van kaniadtong Marso 1, miangkon nga siya sad-an kay mibayad kini sa iyang multahan.

Ang mga sakop sa LTO Operations Branch mitug-an nga sa una nila nga pagsukit-sukit ni Jose Romero nga nagmaneho sa sakyanan miangkon kini nga giabangan niya ang Starex van ni Maria Grizelda Tan og P3,500 ang adlaw aron pasakyan sa iyang mga bisita.

Wala na hinoon moangkon si Romero sa iyang counter-affidavit nga giabangan niya ang sakyanan kay kuno gipahuwaman ra kini kaniya.

Apan nasuta nga lehitimo ang operation sa LTO ug Task Force Alpha didto sa Lapulapu City kay gihimo kini tungod sa report nga daghang sakyanan nga nagpahigayon og kulurom operation kon gigamit isip pasaheroan.

Ang lagda gud nga kadtong gusto nga ang ilang sakyanan himoon nga pasaheroan, kinahanglang mangayo usa sila og pagtugot sa Land Transportation Franchising and Regulatory Board.

Miabot og P6,327.63 ang gibayran ni Tan tungod sa paglapas sa “colorum operation” nga kalapasan sa Section 40 ug 41 sa Republic Act 4136, kon Transportation and Traffic Code. Ang abogado ni Tan mihangyo nga dili na lang suspensohon ang lisensya ni Romero ug isipon nga ang ilang gibayad nga multa mao na ang kinatibuk-ang silot.

Daghan kaayo nga mga tag-iya ingon man drayber og sakyanan nga mohimo'g tinuyo nga salaud unya kon madakpan pwerte nga makareklamo.