Basta Monsenyor, Winner!

Nausab ang kahulogan sa BMW human sa bola sa niaging tuig nga kabahin sa kampanya pagtigom og pundo alang sa dakong gasto sa canonization ni San Pedro Calungsod. Nahimo nang “Basta Monsenyor, Winner!” Kay ang nakadaog sa ikaduhang premyo, BMW 1 Series, mao si Msgr. Achilles Dakay, ang tigpamaba sa Artsidyosesis sa Sugbo.

Way makakuwestiyon sa kaligdong sa bola. Bahala na nga ang nidaog dakong opisyal sa Simbahang Katoliko nga mao ra say gipahinungdan sa kalihokan. Matud sa mga tigpasiugda di kahibudngan nga nakadaog si Dakay kay siyay nakahug sa labing daghang tiket.

***

Apan may sukaranan ang mga pangutana diin gikan ang kuwarta ni Dakay giapil sa bola? Gikan ba sa iyang kaugalingong panudlanan? O gikan sa adunahang mga parokyano nga mahimong wa kabalibad sa iyang solicitation? Kon iya ni Dakay ang dakong kantidad, nganong nagpakitabang pa man ang simbahan sa kabos nga mga parokyano nga nagtumpi man diay ang katigayonan sa kaparian?

Nabanhaw ang kontrobersiya sa BMW ni Dakay tungod sa iyang pagkuwestiyon sa katinuod sa mga pangangkon sa Vatican nga si Pope Francis wa magpuyo sa iyang palasyo sa Artsidyosesis sa Buenos Aires, hinunoa nag-abang og gamayng apartment sa downtown area, nagluto sa iyang kaugalingong pagkaon ug nagsakay sa bus o tren matag adlaw.

***

Buot bang ipasabot si Dakay nga namakak ang Vatican? Gipasanginlan ba niya ang mayoriya sa 115 ka mga sakop sa conclave nga nasayop sa pagbilib sa kayano sa kinabuhi ug kasuod sa iyang mga parokyano ni Cardinal Jorge Mario Bergoglio nga nakaaghat nila pagpili niyang ika-266 nga Santo Papa?

O naglisod lang si Dakay pagtahan sa iyang BMW? O naanad lang sa hunulhunol nga mga sakyanan ug di na ganahang modugang sa kahuot sa PUJs ug buses? O maglabad nang ulo paghunahuna unsay putaheng hikayon kay sa pagpasukad na lang sa Archbishop's Palace?

***

Nahadlok kong wa mag-inusara si Dakay sa pagsalikway sa kausaban nga gisugdan ni Pope Francis. Maong gipili lang unsay tuohan sa iyang mga mithi. Mas sayon dawaton nga supak siya sa kontraseptibo, gay marriage, minyo nga mga pari ug babayeng mga pari. Kay sa pagdawat, nga makapugos nila pagsunod, sa gipakita ni Pope Francis nga tinuorayng pag-alagad sa labing kabos sa mga parokyano, ug bisan sa mga way pagtuo ni pagsalig sa simbahan.

Sa mga misa nga akong natambongan human napili si Pope Francis, wa koy nadunggang pari nga naghisgot sa iyang mga mithi. Pipila gani padayong niila ni Benedict nga Santo Papa. Wa ba lang magsunod sa mga balita ang mga pari? O, samang Dakay, nagpuyo pa sa kalibotan nga silay hawod ug ilang mga parokyano igo lang magyangu-yango bisan unsay ilang gusto?

***

 Email: [email protected]