Ayaw gud kahadlok

Nalipay ko dihang ang kadagkoan sa Liquor Licensing Commission mipahibalo nga tinud-on na nila ang paghimo’g kampanya sa mga namaligya ug ilimnong makahubog duol sa mga tunghaan dinhi sa dakbayan.

Apan duha ka semana na ang milabay ug hangtod karon wala pa’y bisan usa ka tindahan nga natak-opan o nakabayad og multa. Usa nga akong gipanid-an mao kanang anaa mahimutang sa Sanciangko eskena Pelaez kay duol kaayo sa tunghaan.

Kaniadtong Biyernes sa gabii samtang duna ko’y gipalit diha sa dalan Colon, napasiga ang akong mga mata kay usa ka tindahan nga anaa mag-ukopar sa ubos nga bahin sa building sa tunghaan sa Colon — namaligya og beer.

Ang ilang customer diha ra mag-inum sa lamesa nga gipahimutang atubangan sa tindahan dapit sa aseras. Gisiguro g’yud nako, miduol ug misulod ko’s tindahan og nagpatuo nga mopalit aron makita nako kon unsa ang ilang giinom.

Gipahibalo na hinoon nako niini si Mayor Michael Rama ingon man si Dra. Lucille Mercado nga maoy vice chairperson sa Liquor Licensing Commission aron molihok na sila.

* * *

Hangtod karon, wala gayud mabadlong sa City Traffic Operations Management (CITOM) ang mga drayber sa Banco de Oro diha sa Gorordo Avenue nga migamit sa karsada nga grahe sa ilang sakyanan.

Usahay mga upat ngadto sa lima ka armored vehicles sa banko ang anha iparada sa karsada nga makapagamay sa agianan sa mga sakyanan. Aksyoni tawon ninyo kining ilang pagpangabuso uy!

Dili tukma ang ilang gihimo. Duna sila’y parking area sa mga armored vehicle nga tua sa luyo sa ilang building apan nganong anha man g’yud sila diha magsamok-samok sa karsada?

* * *

Nalipay diay ko kay gibadlisan na g’yud sa CITOM engineering section ang tunga nga bahin sa Sikatuna Street, Echavez Street, Tres de Abril Street ug uban pa nga karsada.

Maayo man gud kini kay kon dunay mga abusado nga drayber nga mopadagan sa pikas linya og sugaton ang ubang sakyanan aron lang g’yud sila maka-overtake, wala nay daghang lalis kon sila dakpon tungod sa reckless driving.

* * *

Usa ka tigpaminaw sa DYLA nangutana kanako kon dili ba diay dakpon ang mga konsehal sa barangay kon makahimo’g salaud sa tukmang pagpamaneho. Akong gitubag nga dakpon man gihapon.

Gisaysayan ko ni Press Canceran nga may silingan siya nga konsehal sa barangay didto sa Naga City nga nanghambog kay wala kuno siya gidayon pagdakop sa traffic enforcer bisan og misulod siya’g one-way.

Gipakita ra kuno niya sa iyang ID nga dunay logo sa Department of the Interior and Local Government (DILG) ug gihadlok ang traffic enforcer pinaagi sa pagpangutana sa iyang ngalan. Wala na kuno siya gidakop. 

Pastilan. Kon ako pa’y nakasakop sa maong konsehal dili g’yud nako pasayloon, ilabi na kon gamiton ang iyang pagka konsehal sa pagpanghadlok. Kaniadtong Enero dunay konsehal sa barangay dinhi sa dakbayan nga ako g’yud nga gisakmitan sa iyang lisensya kay nakahimo’g kalapasan.

Tambag nako sa mga traffic enforcers nga kon dunay mga opisyal sa kagamhanan nga makahimo og salaud unya manghulga, ayaw gayud kamo’g kahadlok kay igo ra man kita nagpatuman sa balaod.

Ingon niana ang among gibarugan sa LTO-Task Force Alpha. Nakabantay bitaw ko nga ang ubang traffic enforcers mahadlok kon ang sakyanan sa violators dunay plaka nga PNP-111.

Awhag nako nga ayaw mo kahadlok ug dakpa ninyo ang drayber sa maong sakyanan kon gitangtang nila ang orihinal nga plaka ug ang PNP-111 maoy gipuli sa atubangan.