Kawsa ni Inday Tikay

Si Tisha Ylaya, mas naila nga “Inday Tikay” sa radyo ug “Mommy Tiks” sa telebisyon, nihukom sa pagdagan pagka konsehal sa habagatang distrito sa Dakbayan sa Sugbo nga determinado nga mosusi may luna pa ba ang kaligdong sa gihulagway nga duwa sa yawa. Dihang nangayo sa akong tambag, ako siyang gibugnaw. Gipakapinan og pasidaan nga mahugno lang siya kon makabuylo nang linabayay sa lapok ug nangalisbo nga mga maniobra sa kampanya. Kana kon di mas una nga lamyon ang iyang mga mithi ug prinsipyo.

Nauwaw ko sa akong gihimo. Nagkinahanglan ta og mga tarung sa politika. Kon ang tanang nihulagway sa ilang kaugalingon nga mabuot ug nagpakabana kutob ra sa sulti, mag-piyesta ang tradisyonal nga mga politiko sa pagbugalbugal sa piniliay ug pagpahimus sa madaog nilang katungdanan.

***

Human natiti ang akong pagpabuhagay sa tanang kahadlok sa mahimong mahitabo niya, sa iyang pamilya ug panginabuhi, nakadayeg ko sa kaisog ni Inday Tikay. Napamatud-an nang iyang kamatinabangon sa labing nagkinahanglan ug kaisog pagbarog batok sa kahiwian. Gitahod nako ang iyang baruganan nga makahimo siya og mas makahuloganon nga kausaban sa katilingban kon makahupot og katungdanan sa gobyerno.

Nga mahimo usa ka pagpakabuang. Kay wa siyay kuwarta. Lig-on ang ilang mga kaatbang. Apan way mas takos nga mosuway paghagit sa kahugaw sa piniliay kay ni Inday Tikay.

***

Dihang tinun-an pa, gibatokan ni Inday Tikay ang nabisto nga kahiwian sa ilang parokya. Iyang kalinghod wa kababag niya pagpangayo og kuwentada giunsa paggasto ang wa na igkita nga kuwarta sa ilang panudlanan. Bisan ang parokya niggamit sa labing inilang mga abogado sa Sugbo, apil nang kanhi Sugbuanong chief justice sa Korte Suprema, wa matarog si Tikay pagbarog alang sa kamatuoran.

Napilde siya sa kaso. Nabatyagan nga ang iyang kabatan-on gipahimuslan sa mga nag-una niya sa duyan pinaagi sa paggamit sa tanang palusot sa hukmanan. Inay mabugnaw, si Inday Tikay nipalambo sa iyang pagpakabana. Nga nabantang ug gihangop sa kadaghanan dihang nasud siya sa radyo ug telebisyon.

***

Gisultihan ko ni Inday Tikay sa pait niyang kasinatian human nakasumiter og certificate of candidacy. Ilang mga kaatbang ug bisan ang iyang kaubanan niputos na sa tibuok dakbayan sa ilang propaganda. Nga klarong pamintaha kay karon pa mang Marso magsugod ang kampanya.

Wa kong kapugong pagsukmat niya. Nga wa magkuwang pagpasidaan sa kalaksot sa politika. Apan sa makausa pa nauwaw ko sa akong gihimo. Nagkinahanglan siya og tabang. Di panghimaraot. Mao nga pinaagi ning kabos nga lindog tuguting lab-ason ang akong pasalig ni Inday Tikay nga bisan sa akong kakabos ako siyang tabangan. Hinaot nga ang mabuot ug nagpakabanang mga lungsoranon nga nakabasa ini modasig sab niya pagpadayon sa mapangahason niyang kawsa.

***

Email: [email protected]