Hinuktuki mayor!

Tungod sa kahagip-ot kon kagamay ra sa ubang bahin sa karsada nga agian sa Sinulog Grand Parade dili makapahigayon og nindot nga pasundayag ang mga sakop sa lainlaing contingents.

Gituyo ko kini pagtuki dinhi kay duna pa’y igo nga panahon nga kahimoan og paagi aron mas monindot pa nga tan-awon ang pasundayag ingon man mominus-minus ang problema pagkontrol sa crowd.

Sa milabay’ng katuigan, gikahinabi nako ang mga dancers sa lainlaing contingents og gibutyag nila nga wala sila’y laing mahimo gawas sa paglakaw lang sa mga karsada nga hapit gani sila dili makalihok.

Unsa man kining maong mga karsada? Sagad niini anaa mahimutang sa  General Maxilom Avenue gikan sa eskena Gorordo Avenue ngadto na sa Fuente Osmeña.

Ang bahin sa Osmeña Boulevard gikan sa Fuente Osmeña paingon sa Sports Center lapad man basta hawanan lang g’yud sa crowd control personnel nga dili moadto sa karsada ang mga tawo. Ang tumong niini nga kahatagan og lugar ang mga contingents nga makasayaw.

Ang ubang karsada nga gamay kaayo tungod sa sementado nga “barriers” nga gibutang taliwala sa karsada, anaa sa P. del Rosario dapit na sa eskena Imus Street.

Walay problema sa lane sa Imus Road kay lapad man ang maong karsada, apan gani mora’g kuwang lang gihapon, ilabi na kon magtanga lang ang crowd control personnel.

Gitan-aw nako pag-ayo, dili man lisud nga tangtangon lang usa nato ang sementado nga barriers nga gibutang taliwala sa karsada nianang mga karsada nga gamay kaayo ang lugar.

Dihang gipresentar nako kining maong sugyot ngadto ni Mayor Michael Rama human sa Sinulog kaniadtong miaging tuig, miingon siya nga mahimong makonsiderar ang maong sugyot.

Palihog kuno mayor, patun-i kini sa CITOM kay kon mahimo kini, mapaminus ang problema sa crowd control ug mas monindot pa ang pasundayag sa mga contingents.

Tan-awa ra gud mayor, kanang maong mga sementado nga road barriers, maoy makapugong sa mga dancers nga mosayaw. Sa laktod walay lami ang makita nimo sa maong mga dapit kay maglakaw ra man ang mga dancers.

Ang Sinulog Foundation Inc. manghatag og Sinulog ID’s aron kadtong gihatagan mao ra’y tugotan nga makasulod sa rota sa Sinulog aron dili masamok, apan daghang mga tawo nga magsuroy-suroy sulod sa rota nga walay ID sa Sinulog.

* * *

Akong diay nga klarohon nga ang tinun-an sa  Asian College of Technology (ACT) nga mga city scholars miabot lang og 5,589 karong tuiga, dili 55,589 sigun sa napublikar sa Freeman niadtong Dominggo.

Ako man gud ang nagsuwat sa maong balita unya wala tuyoa nga nadugangan sa editor ug usa ka numero. Ako lang giklaro kay gigamit ra ba kini ni manlalaban Aristotle Batuhan sa gipasaka niya nga kaso batok ni Konsehal Rodrigo Abellanosa didto sa Malacañang.

Ang isyu nga nakalapas kuno si Abellanosa sa balaod kay bisan og konsehal apan ang iyang tunghaan nakabenipesyo sa scholarship program sa dakbayan.

* * *

Maayo unta og ang mga kandidato sa umaabot nga eleksyon nga wala sa aktibo nga serbisyo dili mopahimulos sa Sinulog activities. Wala mo mauwaw nga klaro kaayo nga mipahimulos sa higayon?

Husto ang gihimo ni Mayor Rama nga gimando niya nga panangtangon ang mga campaign materials sa mga kandidato nga anaa sa parade route, ma iya man sa taga BOPK ug Team Rama, apan nganong wala man niya badlonga ang mga kandidato nga miuban sa parada adto pagsugod sa Sinulog sa miaging Biyernes?

Sa sunod mayor, ayaw na tuguti ang mga kandidato nga mohimo og ingon niadto, gawas kon ang kandidato aktibo pa sa serbisyo.