Garbo ni Gwen

Mahimong nahukman na sa Court of Appeals (CA) ang petisyon ni suspendidong Gobernadora Gwen Garcia nga nagkuwestiyon sa legalidad sa iyang pagkasuspenso sa inyong pagbasa ini. Kana kon matinuod ang pangagpas sa mga abogado ni Acting Governor Agnes Magpale nga mahukman nang kaso sud lang sa usa ka adlaw.

Mahimo sab hinuon nga mainat pa ang kontrobersiya hangtod sa sunod semana. Kana kon matuman ang pangagpas sa abogado ni Garcia nga si Tranquil Salvador III nga maabtan pang mga mahistrado sa CA og tulo ngadto sa upat ka adlaw una kaluwatan ang resolusyon sa kaso.

*   *   *

Ang paghisgot nang daan sa mga abogado ni Garcia nga makahimo pa sila sa pagdangop sa Korte Suprema di maayong timaan sa ilang paglaom nga makakuha og temporary restraining order (TRO) gikan sa CA. Ang mga pangutana nilang Presiding Justice Vicente Veloso ug ubang mahistrado sa CA 12th Division wa sab mopabor sa kawsa ni Garcia.

Si Veloso nikurihir pa gani sa petisyon nga gipasaka ni Garcia. Inay TRO, nisugyot siya nga certiorari unta pagpanalipod sa iyang mga katungod ang gisang-at ni Garcia. Nipasabot pa si Veloso nga di mahimong pugngan ang pagkasuspenso ni Garcia sa way pagpahamtang og di mabakwi nga kadaot sa gobyerno.

*   *   *

May sukaranan sab hinuon si Salvador sa pagtambag ni Garcia nga di angay’ng maluya sa mga pangutana nga giluwatan sa mga mahistrado. Kay di masihag ang baruganan sa mga mahistrado pinaagi sa mga pangutana. Nga kasagaran gitumong lang sa pagtuki sa kinatibuk-ang kontrobersiya aron matabangan ang ilang pagtimbang-timbang sa mga merito.

Apan lisod sagngon ang tambag ni Veloso ngadto ni Garcia sa di na lang una pagsaba-saba samtang nagpaabot sa hukom sa CA sa iyang petisyon. Wa hinuon ni  kapugong sa mga abogado ni Garcia sa pag-insistir nga mag-pabilin ang ilang kliyente sa iyang buhatan bisan wa silay nakuhang TRO.

*   *   *

Nagkadugay si Garcia sa pagtanggong sa iyang kaugalingon sa Kapitolyo, nagkagamay ang kahigayonan nga makakuha siya og TRO. Kun mapilde sa CA, mas tungason ang pagkuha og mas dinalian nga tabang gikan sa Korte Suprema.

Nga makapatumaw sa mas dakong problema ni Garcia. Unsaon man pagkanaog sa iyang buhatan nga di mawad-an og nawong? Kay nanganti ra ba nga mapapahawa lang siya kun patay na. Hinaot nga may makahunghong ni Garcia nga ang iyang silot suspenso ra, di kamatayon. Di gani priso. Angay siyang tambagan nga may mga higayon nga angay’ng dawaton ang kapildehan. Aron mas kapanalipdan ang iyang kaugalingon sa laing mga adlaw. Labaw sa tanan, angay siyang pahinumdoman nga mas mahinungdanon ang interes sa Sugbo ug mga Sugbuanon. Kay sa iyang garbo.

***

Email:  [email protected]