Diktador ug Gobernadora

“Di ko mopahawa. Di ko motahan. Di makiangayon ang mga awhag nga manaog ko sa katungdanan. Di nako talikdan ang mandato sa kinabag-an sa katawhan. Anhi ko mabuhi ug magpakamatay sa akong buhatan.”

Ang nagsulti ini di si suspendidong Gobernador Gwen Garcia. Kon dili ang diktador sa Syria nga si Bashar al-Assad. Managsama sila nga naapiki. Si Assad nameligro nga mapalagpot gikan sa gahom tungod sa lapad nga gubat sa Syria nga nanukad sa pag-alsa sa katawhan batok sa malupigon niyang rehimen. Si Garcia gisuspenso human nakonbikto sa kasong administratiba nga gipasaka ni anhing Bise Gobernador Greg Sanchez batok niya.

***

Di makiangayon ang pagtandi ni Garcia kang Assad. Si Assad gipasanginlan nga nigamit sa labing bangis nga puwersa aron pagluba sa labing menos 60,000 sa iyang kaugalingong katawhan. Si Garcia igo lang nakaplagan nga sad-an sa pag-abuso sa gahom ug pagpangyatak sa katungod sa iyang bise gobernador.

Si Assad nakapanunod sa 42 ka tuig nang diktadura sa ilang pamilya sa Syria. Si Garcia igo lang nipadayon sa 18 ka tuig nang pamunoan sa ilang pamilya sa Kapitolyo. Si Assad gipasanginlan nga nakahimo og krimen batok sa katawhan. Si Garcia igo lang gipasanginlan nga ni-bangkarota sa panudlanan sa Sugbo.

***

Kon mapalagpot si Assad sa gahom, maglisod na siya pagbalik. Mahimo ganing mapul-an na og pangita og suok sa kalibotan nga matagoan kon mapulihan gyud sa labing higpit niyang mga kaatbang. Mahimo ganing mataral sa kalibotanong hukmanan sa labing bangis nga mga krimen nga gipasangil batok sa iyang pamunoan.

Si Garcia igo lang nasuspenso. Di siya prisuhon. Gawas lang kon makonbikto sab sa mga kasong kriminal nga iya karong giatubang sa Sandiganbayan--apil nang pagpalit sa luna ilawom sa dagat sa mga Balili sa Tinaan, Naga City ug ang giingong anomaluso nga pagtukod sa Cebu International Convention Center (CICC).

***

Maong wa gyud untay sukaranan si Garcia nga mamahimong desperado sama ni Assad. Mas takos unta nga manalipod sa iyang kaugalingon kon gituman pa lang ang suspension order samtang gikuwestiyon ang legalidad ini atubangan sa mga hukmanan. Mahimo pa ganing makuha ang simpatiya sa mga Sugbuanon kon kapamatud-an nga gigamit lang sa Malakanyang ang kaso ni Sanchez paggukod niya.

Lahi ni Assad, si Garcia makahimo pa paghupot og laing katungdanan sa gobyerno. Tungod sa dako niyang puntil, dako ang kahigayonan nga makadaog siya pagka kongresista sa ikatulong distrito sa Sugbo. Mahimo pa ganing matuman ang iyang damgo nga mag-senador kon makapakita og maayong labok sa Kongreso. Apan tungod sa pagpilit sa iyang buhatan ug paglapas sa balaod, mahimo nga si Assad ug si Garcia managsama og dangatan.

***

Email: [email protected]