Mas makahulogan nga Pasko

Wa mahinayon ang Christmas Party sa ABS-CBN Cebu niadtong Sabado. Gikanselar ang indigay unta sa sayaw tali sa mga departamento. Wa sab mapahigayon ang naandan nga pagbola sa bililhon nga mga premyo. Apan, sa 17 ka tuig na nako sa kompaniya ug sa 28 ka tuig na nakong pagpanibya, mao toy labing makahuloganon nga pagsaulog sa Pasko nga akong nasaksihan.

Gikanselar ang among party tungod sa nagpadayon nga pagpamutos sa mga hinabang gikan sa mga Sugbuanon alang sa mga biktima sa bagyong Pablo sa Kabisay-an ug Mindanao. Ang napapas nga kalihokan maoy nipatumaw sa mas lunsay nga diwa sa Pasko.

***

Nahukman sa mga tagduma sa ABS-CBN Cebu nga gipangulohan ni Visayas Cluster Head Tata Cinco-Sy nga bisan way party ipadayon ang Santos nga Misa. Kay nagsilbi man sab nga kabahin sa binuwan nga mga misa sa kompaniya. Gidapit namong mga boluntaryo sa pagpahuway kadiyot sa pamutos aron pagtambong sa misa.

Mao toy labing unang higayon nga mas daghan pang taga gawas kay sa mga kawani nga nakatambong sa misa. Kay kabahin man sa misa ang pagpahalipay ug paghatag og gasa sa mga nagsaulog sa ilang sumad sa adlawng natawhan, gipaapil ang mga boluntaryo nga nagatawo sa samang buwan.

***

Sa iyang wali atol sa misa, si Fr. Soc Saldua maoy nipalawom sa kahulogan sa kalihokan. Matud niya dako ang sakripisyo sa mga namutos sa mga hinabang--gibiyaan ang ilang naandang gimbuhaton, gitalikdan gyud gani ang ilang mga pamilya, aron pagtabang sa mga biktima sa bagyo.

Gitataw niya nga kon katalagman nay hisgutan, labi na nga Sugbo man gyud untay puntirya ni Pablo, mas maayo gyud gihapon nga maoy mamutos kay sa maoy pustan. Nipasabot si Saldua gikinahanglan ang pagsakripisyo aron paghatag og kalipay sa uban. Nga maoy tinuod nga kahulogan sa Pasko. Nga nahimutang sa kasingkasing sa mga namutos.

***

Gihinayon sab ang salusalo human sa misa. Inay buffet, gipalihog ni Ma'am Tata ang caterer sa pag-andam og food packs. Gidapit niya ang tanang boluntaryo sa pag-ambit sa panihapon bisan wa siyang kahibawo paigo bang among giandam. Kon simbako magkuwang, gikutlo niya ang iyang inahan, bahala’g gamay basta angay.

Nga mao say kabalaka ni Fr. Saldua atol sa pagpangalawat. Labihan niyang hinangopa nga naigo ang iyang kataposan nga ostiyas alang sa kataposan nga nikalawat. Mabalak-on ming nisilbi sa pagkaon--una sa mga boluntaryo ug dayon sa mga kawani. Kon niadtong tungora may mga kawani pa sa ABS-CBN nga nagduda sa kamakiangayon sa pagkanselar sa among party, nakaseguro ko nga hingpit nang napapas. Kay human napupos ang taas nga lumbay sa mga boluntaryo ug mga kawani may pipila pang sobra.

***

Email: [email protected]