Pasiunang hinabang sa Sugbo

Gatosan ka nagpakabana nga mga Sugbuanon ang nitubag sa among mapangahason nga pagdeklarar og “Kapamilya Putos Day” tibuok adlaw gahapong adlawa. Nalukop ang ABS-CBN Broadcast Complex sa Jagobiao, Mandaue City sa mga boluntaryo nga nagtinabangay sa pagpamutos sa gibanabanang kapin sa P6 milyones nga balor sa relief goods. Nga nahipos sa kapin sa semana nga Kapamilya Relief Campaign alang sa mga biktima sa bagyong Pablo.

Salamat sa pagtinabangay sa mga Sugbuanon, nakapada dayon mi sa pasiuna nilang mga hinabang alang sa Kabisay-an ug Mindanao. Ang mas dakong bulto sa mga hinabang mapada na sa mga dapit nga labing naggusbat ni Pablo sunod semana.

***

Niabot og 17,164 ka pamilya, o 81,610 ka indibiduwal, ang naigo sa hinungaw ni Pablo sa Central Visayas. Naggikan sila sa 61 ka dakbayan ug kalungsoran sa rehiyon: 14 sa Sugbo, 24 sa Negros Oriental, 17 sa Bohol ug unom sa Siquijor. Nahimutang sila sa 145 ka evacuation centers.

Daghang salamat sa pagpahimutang nang daan sa mga hinabang sa mga dapit nga nahulga sa bagyo, ug sa paspas nga paglihok sa Department of Social Welfare and Development (DSWD 7), natabangan dayon silang tanan. Nga usa ka evacuation center ug usa ka pamilya na lay nahibilin—sa Boljoon, habagatang Sugbo.

***

Maong gitambagan ming Jaybee Binghay Carillo, tigpamaba sa DSWD 7, nga motingob na lang sa among atensiyon sa mas nagkinahanglan nga mga biktima sa Mindanao. Ang DSWD sa Dumaguete nipahibawo hinuon namo nga duna pay usa ka libo ka pamilya sa Negros Oriental nga tabanganan. Maong nagpada dayon mi og 1,000 ka food packs ug sinakong sinina, tubig ug mga gamit sa bay sakay sa trak sa Atlas Management Construction ngadto sa Dumaguete pinaagi sa George and Peter Lines.

Sunod namong suliran mao ang kanihit sa mga barko para Davao City. Kansang pantalan sa Sasa maoy labing duol nga agianan sa mga hinabang alang sa Davao del Norte ug Davao Oriental.

***

Ang Philippines Span Asia Carrier Corp. (kanhi Sulpicio Lines), ang bugtong mobiyahe gikan sa Sugbo paingon sa Davao, nihatag dayon og sulbad. Gipahibawo mi sa usa sa ilang tagduma nga si Devin Go nga kausa ra matag semana ang biyahe. Gitabangan mi nilang Manny Limtong sa Lim Tong Press, kinsa nakiglambigit dayon ni Edward Go, bise presidente sa PSACC, nga makasakay ang among relief goods sa sunod nilang biyahe.

Ang Gothong Southern Shipping Lines ang mopasakay sa relief goods sa mga Sugbuanon paingon sa Cagayan de Oro. Ang among kaubanan sa ABS-CBN Cagayan de Oro maoy modawat sa kargamento ug mangunay paghatod sa mga hinabang ngadto sa gipanggutom nga mga biktima sa Compostela Valley.

***

Email:  [email protected]