Paghatod sa mga hinabang

 Nakabuylo nang among pagpamutos sa mga hinabang sa mga Sugbuanon alang sa mga biktima sa bagyong Pablo. Kapin sa usa ka semana human gilusad ang Kapamilya Relief Campaign, nakatigom mi og gibanabanang kapin sa P6 milyones nga cash, tseke ug relief goods. Nga kinahanglang puston, ihatod ug iapud-apod sa labing daling panahon ngadto sa mga biktima sa Sugbo ug Central Visayas ug sa mas nagusbat nga mga lalawigan sa Mindanao.

 Nagkinahanglan mi og dugang mga boluntaryo. Nga makatabang paghatod sa tanang hinabang sa Sugbo karong semanaha, sa ubang bahin sa rehiyon karong weekend ug sa Mindanao sunod semana.

***

 Nangahas mi pagdeklarar og "Kapamilya Putos Day" aron pagdasig sa tanang nagpakabana nga mga Sugbuanon sa pagtampo sa ilang panahon pag-repack sa relief goods. Kun makahigayon ka pagkuyog namo sa ABS-CBN Broadcast Complex sa Jagobiao, Mandaue City, hangpon ka namo sa tumang kamapasalamaton.

 Di kinahanglan nga tibuok adlaw ang imong itampo. Kon makagahin lang og pipila ka oras sa buntag o sa hapon, dako na kaayo ang imong ikatabang. Dasigon sab ka namo pagdapit sa ubang mga sakop sa imong pamilya o sa imong mga silingan o mga higala. Aron nga usa mo ka malipayong grupo nga moduyog ning lapad nga bul-og sa pagtinabangay.

***

 Natandog ko pag-ayo sa padayong pagbaha sa mga hinabang dihang among gipahibawo nga tak-opan nang among booth sa Fuente Osmeña kay gamiton sa City Hall ang duha ka tolda nga ilang gipahuwaman namo. Si Konsehal Clifford Jude Ninal sa San Nicolas Proper sa Dakbayan sa Sugbo nitanyag pagpahuwam namo og tolda aron makapadayon pagpanawat og mga hinabang sa Fuente.

 Ang Ceres Bus nipagamit sa tulo nila ka buses pagtabang paghakot sa mga hinabang gikan sa Fuente paingon sa Jagobiao. Nagpahuwam sab sa ilang trak ang Atlas Management Construction, ang Ninal Trans, si Talisay City Councilor Val Ylanan ug Negosyante Yul Julia.

***

 Labing dakong hinabang nga among nadawat gikan sa University of Southern Philippines Foundation (USPF), nga nihatag og P130,000 nga tseke. Ang labing daghang hinabang gikan sa wa magpahingan nga mga Sugbuanon--taxi ug PUJ drivers nga nitugyan sa kabahin sa ilang kita, mga tinun-an nga nitahan sa ilang mga bawon, mga kawani sa gobyerno ug pribadong sektor nga nipaambit sa ilang suholan, bisan mga mamasurahay nga nihatag sa pipila ka sensiyo nga halin sa ilang mga baligya ug pari nga nitampo sa kinatibuk-an niyang kolekta sa misa.

 Makapatandog sang gihimo sa Maguikay Settlers Homeowners Association, nga nahulga sa pag-awas sa suba sa Butuanon matag bunok sa uwan, nga nikanselar sa ilang Christmas party ug nitunol og P5,000 ug usa ka sakong bugas humay alang sa mga biktima ni Pablo.

***

Email: [email protected]