1.5 milyones ka deboto sa SRP

Mga tagduma sa seguridad sa National Thanksgiving Mass alang ni San Pedro Calungsod nangandam nang daan sa kahigayonan nga moabot og usa ug tunga ka milyon ka deboto ang motambong sa kalihokan. Gipasalig nila nga ang 27 ka ektarya nga luna sa South Road Properties (SRP) sa Dakbayan sa Sugbo, nga maoy nahimutangan sa templete, hamugaway ug di mahitabong maghuot ang mga manimbahay.

Si DILG Secretary Mar Roxas nia sa Sugbo pagpangunay pagduma sa pangandam alang sa makasaysayanong kalihokan nga tambongan ni Presidente Noynoy Aquino ug sa labing dagkong haligi sa Simbahang Katoliko.

***

Sa iyang pakighinabi sa Arangkada sa DYAB 1512 khz, gipahibawo ni Roxas nga kapkapan ang tanang deboto nga mosud sa SRP karong Biyernes. Apilon sa pagsusi ang kaliboan nga manguyog sa prosesyon gikan sa amihanan ug habagatang bahin sa Sugbo. Nipasabot si Roxas nga gikinahanglan ang higpit nga seguridad aron pagpanalipod sa tanang manambong gikan sa mga elemento nga mahimong magpahimus sa dakong tapok sa katawhan aron pagpasiugda og duguong kaguliyang.

Nipasalig si Roxas nga di maapektahan ang ka-solemne sa misa bisan sa presensiya sa Presidential Security Group (PSG). Matud niya nahimo na ni nila sa pagtambong ni Presidente Aquino sa nangaging relihiyusong kalihokan.

***

Ang pahibawo ni Roxas nasukwahi sa nahaunang kasabotan tali sa kaparian ug sa kapolisan. Matud ni Msgr. Marnell Mejia, tagduma sa mga prosesyon, ang higpitan pagsiksik sa kapolisan mao ra ang mga karosa nga gamiton sa prosesyon—bantayan nila sugod sa pagpangandam hangtod na sa pagsugod sa prosesyon.

Ambot pila ka checkpoints ang gikinahanglan aron nga di maputol ang prosesyon sa mga deboto gikan sa mga parokya sa tibuok Artsidyosesis sa Sugbo. Matud ni Roxas dunay igong mga guwardiya nga mokapkap sa tanan. Maong giawhag niyang mga deboto sa pagsayo pag-adto sa SRP aron nga di maghuot ni motaas ang linya sa mga manambong.

***

Aron pagpasayon sa pagduma sa kalihokan, gibahin sa kapolisan ang kinatibuk-ang luna ngadto sa mas gagmay nga blocks. Ang matag block nga may gidak-on nga usa ngadto sa duha ka ektarya palibotan og mga polis. Nga mas makabantay sa mas gamayng teritoryo kay di na man magkapuliki og lingi sa tanang direksiyon sa lapad nga lawod sa katawhan.

Matud ni Roxas ang seguridad molahutay hangtod sa alas-10 sa gabii karong Biyernes. Kay di man mahitabo nga makagawas dayon ang tanan inigkahuman sa misa. Nipasalig siya pagpangita og mga sakyanan nga ikapuno sa giandam sa mga tigpasiugda. Aron mas daling mahakot ang mga deboto paingon sa mga terminal. Sa ingon, kalikayan ang pagkaangol sa taas nga baktas, sa kakuyaw sa kangitngit ug sa pagpamanhig sa mga lain og tuyo.

***

Email: [email protected]