Gamita ang inyong utok!

Dunay awhag si Konsehal Edgardo Labella sa kadagkoan sa Government Service Insurance System (GSIS) ug Social Security System (SSS) nga tun-an nila ang bag-ong balaod nga maghatag og padayong serbisyo ngadto sa mga sakop nila nga miretiro na sa serbisyo.

Matud ni Konsehal Labella nga gilatid kining maong balaod sa Republic Act 9994 nga makahimulos gihapon sa serbisyo ang mga sakop sa GSIS ug SSS bisan og sila mga retirado na sa tagsa-tagsa nila ka trabaho.

Gibatbat ni Labella nga ang mga retirado nga sakop sa GSIS ug SSS, makapahimulos gihapon sa serbisyo sa government insurance systems bisan kon sila wala na sa aktibo nga serbisyo. Sa ato pa, maglakip niini nga makahuwam sila og salapi ug mahimong bayran gikan sa ilang binuwang pensyon.

* * *

Maghisgot  ta og huwam kon “loan,” may bag-o na diay karon nga lagda ang SSS nga makahatag tabang sa ilang mga sakop, sama nako.

Kaniadto gud nga Sabado, gitawag ang akong atensyon ni The Freeman Opinion Editor Quennie Bronce ug gipakita ko niya sa bag-ong memorandum circular sa SSS.

Sa maong memorandum circular nagtugot na kini nga ang mga sakop sa SSS makahimo na pag-loan pagbalik kon makabayad na sila og katunga sa kantidad sa ilang “original loan.”

Nagpasabot kini nga kon ang imong loan P24,000 nga bayran unta sulod sa duha ka tuig, kon subra ka na sa tuig nga walay hunong pagbayad o nabayran na nimo ang katunga sa imong obligasyon, makahimo ka na sa pag-loan pag-usab.

Gituki nako kini kay aron mahibalo ang ubang mga sakop sa SSS nga wala pa mahibalo niining bag-ong lagda sa SSS. Sa Pag-IBIG hinoon, pwerteng nindota kay unom ka buwan nga makabayad ka, pwede na ‘sab nga mo-loan pagbalik.

Makatabang man gud kini ilabi na kadtong nanginahanglan og kwarta alang sa bisan unsa nga gastohan.

* * *

Isip usa ka motorista, akong nabantayan nga dunay “traffic hazard” sa entrada nga bahin sa Sergio Osmeña Avenue kadtong kanhi McArthur Boulevard gani diha duol sa Plaza Independencia.

Kon gikan ka sa Legaspi Extension kilid sa Plaza Independencia unya mo-left turn ka paingon sa Sergio Osmeña Avenue kilid sa tunnel, kuyaw kaayo nga madam-ag ka sa kabahin sa “island” nga gimugna nila duol g’yud sa entrada.

Sa akong pagtimbang-timbang, angay nga sapsapan ang maong bahin sa “island” unya pintalan og kolor nga dali ra makit-an sa mga motorista. Kanus-a pa man kita molihok, kon may hitabo na?

Gituyo nako kini nga gihisgutan dinhi kay si Mayor Michael Rama mobasa man g’yud niining akong lindog. Lain pa nga “island” nga angay’ng sapsapan mayor Mike mao kadtong tumoy nga bahin nga habig sa Escario ug Don Gil Garcia Street.

* * *

Nahibulong ko nganong wala gihapon kuhaa kanang lapad kaayo nga placard nga iya sa contractor nga nagtugot sa Robinson’s Residence daplin sa Gorordo Avenue dili layo sa University of Cebu.

Traffic hazard man kana kay ang iyang gilapdon sura ra kaayo. Nagpahibalo kini sa mga motorista nga “crossing area” kana sa mga heavy equipment nga naghakot sa ilang mga kinubkob gikan sa luna ug sa mga maghakot og materyals.

Pagdestino mo og kawani nga mo-traffic kon mogawas na ang mga dump truck ayaw og butangi anang lapad kaayo nga placard ang taliwala sa karsada kay makabalda ni sa pag-agi sa mga sakyanan!

Gamita ang inyong utok!