Konsiyerto alang ni Marlon

Bisan unsay kahimtang sa panahon, mag-init man o mag-uwan, mahinayon ang labing dakong piyesta sa libreng mga pangalagad sa Sugbo ug Kabisay-an, ang Grand Halad sa Kapamilya, tibuok adlaw karong Sabado, Nobiyembre 30, sa Main Campus sa Cebu Technological University (CTU) sa M. J. Cuenco Avenue, Cebu City.

Kaliboan ka Sugbuanon ang mag-abot aron moambit sa talagsaong gasa sa paghinatagay gikan sa alas-6 sa buntag hangtod sa alas-5 sa hapon. Ang mga may katakos ug kasingkasing sa pagtabang mohangop ug moatiman sa labing kabos, labing masakiton ug labing nagkinahanglan nga mga Kapamilya.

***

Labing dugukon ang libreng medical services nga maglakip sa konsultasyon ug mga tambal sa kasagarang mga sakit sa mga bata ug mga dagko, laboratory services sama sa x-ray, fasting blood sugar, urinalysis, total cholesterol, complete blood count, blood typing ug triglyceride, pagpangibot sa ngipon ug pagsusi sa grado sa mata ug pagpanghatag og gatosan ka reading eyeglasses.

Duna say duha ka blood donation activities: Ang Regional Blood Center (RBC) manukad sa CTU sa pagtigom og dugo pangandam sa bisan unsang emerhensiya nga motumaw sa National Thanksgiving Mass ni San Pedro Calungsod ug ang Chong Hua Hospital nga adto manukad sa ilang main lobby sa uptown area.

***

Libre sang pangalagad alang sa mga iro ug iring: Bakuna, kapon, purga, eye ug ear checkup, ECG, derma ug CBC. May libre nga tupi, masahe ug reflex. Gidapit ang mga tag-as og buhok pagtabang sa kampanya paghimo og wig alang sa mga pasyente sa kanser. Labaw pang libre ang pag-ayo sa electronic gadgets: Linux, Android, Mac, Windows, iPad, iPhone, desktop ug laptop.

Libre sang konsulta ug notaryo sa mga abogado. Kaliboan ka trabaho ang gitanyag sa Kapamilya Mega Local ug Overseas Job Fair nga pasiugdahan sa DMDP Cebu City sa Abellana National School Gym. Libreng lugaw, noodles, ice cream ug duwa sa mga bata.

***

Daghan ang libre nga seminars ang katambongan: Pagluto ug patigayon sa pagkaon uban sa CTU professors; project management uban sa NEDA experts; newscasting uban ni Charie Villa sa ABS-CBN News; ug livestock ug hograising.

Human sa tibuok adlaw nga pangalagad, ipahigayon ang konsiyerto pahinungod ni DYAB Anchor Marlon Bellita, nga na-coma hangtod karon sa ICU sa Chong Hua Hospital. Dasigon ang mga manambong sa pagtampo sa pundo alang sa nagkadako nga bayranan sa ospital. Ang mga naminaw ug nanan-aw sa DYAB sa ubang mga lalawigan ug kanasuran mahimong mo-deposito sa account nga gituyo namo pag-abli alang ning maong katuyoan: BPI Savings Account No. 1173-1880-28 (Swift Code sa taga gawas sa Pilipinas: BOPIPHMM); Account Name: Leo A. Lastimosa o Arlene A. Caballes (ABS-CBN Cebu Finance Officer).

***

 Email: [email protected].