Kagahi sa ulo ni PNoy

 Way balaod nga nalapas si Presidente Noynoy Aquino sa pagtudlo sa suod niya nga mga higala sa mahinungdanon nga mga buhatan sa gobyerno. Way makalalis sa pagpatabang sa mga tawo nga hingpit niyang kasaligan—classmates sa Ateneo, mga alalay sa firing range ug mga kauban sa pakigbisog batok sa diktadurang Marcos, sa mga kudeta niadto nilang Senate President Juan Ponce Enrile ug Senador Gringo Honasan ug panggukod sa kurakot nga pamunoan nilang Gloria ug Mike Arroyo.

Way problema kon ang iyang mga suod matinud-anon nga motuman sa ilang trabaho. Magsugod ang iyang labad sa ulo kon molikoy sila.

* * *

Wa untay problema si Aquino kon ang tanan niyang tinudlo sama pa katakos ug kakugihan ni Energy Secretary Rene Almendras, ang Sugbuanon niyang classmate sa Ateneo. Kinsa determinadong nisulbad sa krisis sa kuryente sa Mindanao ug ubang bahin sa nasud, paspas nga nipabalik sa suga sa mga dapit nga naigo sa grabeng katalagman, takos nga nibalanse sa kaliboan ug usa ka interes ug ligdong nga nipatuman sa binilyon ka pesos nga mga kontrata sa industriya sa enerhiya.

Apan makapangawot sa di katol si Aquino dihang nahilambigit sa kadudahang mga transaksiyon silang kanhi DILG undersecretary Rico Puno ug ubang mga sikit kaayo sa iyang kasingkasing.

* * *

Usa nila mao si Land Transportation Office (LTO) Chief Virginia Torres. Kinsa, segun sa kasaligang mga tinubdan, maoy tinuod nga hinungdan sa kalit nga resignasyon ni kanhi transportation secretary Ping de Jesus. Gikatahong gisalikway ni Torres ang mga sugo ni de Jesus, nga maoy iyang labaw. Dihang nidangop si de Jesus sa Malakanyang, si Torres ang kanunayng gipaboran ni Aquino.

Maong dihang gitudlo siya puli ni de Jesus, nihangyo si Mar Roxas nga magbutang siya og executive director nga maoy tinuod nga mokontrolar sa LTO. Ug dihang gitudlo siya puli ni anhing DILG secretary Jesse Robredo, niawhag si Roxas nga tangtangon si Puno.

* * *

Akong gipangutana si kanhi kongresista Risa Hontiveros, usa sa labing suod ni Aquino, sa mga paniid nga gahi og ulo ang presidente: Nga nakapalig-on sa iyang liderato sa mga higayon nga sakto siya, sama sa impeachment ni kanhi chief justice Renato Corona; apan nakapauwaw sab sa iyang pamunoan sa mga higayon nga sayop siya, sama sa pagpirma niya sa Cybercrime Prevention Act of 2012.

Nidason si Hontiveros nga lisod kumbinsihon si Aquino pag-usab sa iyang baruganan. Nga iyang gilaoman nga naumol human sa konsultasyon. Nipasalig hinuon si Hontiveros nga human sa kapin sa duha ka tuig sa palasyo mas suhito na si Aquino sa iyang gahom. Matud niya ang kaligdong ni Aquino maoy garantiya nga mohimo siya sa tukmang kausaban paghimong mas makiangayon ug mas epektibo sa iyang pamunoan.

* * *

Email: [email protected]