Pagtimaan sa ilang kainutil pagbadlong sa pamintaha sa adunahang mga politiko, human hingpit nga gibasura sa Korte Suprema ang tanang pagdili batok sa premature campaigning, si Comelec Chairman Sixto Brillantes igo na lang sa pagkuhit sa tanlag sa mga magpapili unya sa Mayo 13, 2013 pinaagi sa pag-awhag nila paghupot og delicadeza sa di lang una pagpangampanya hangtod nga magsugod ang campaign period sayo sunod tuig.
Mahimong kinasingkasing ang awhag ni Brillantes. Iya hinuong “di-kaayo-puno-sa-delicadeza” nga paghupot sa mga kaso sa wa pa matudlo sa Comelec mopasidaan nato nga di siya matinud-anon. Apan may luna pa ba tuod ang delicadeza sa piniliay sunod tuig?
***
Uban sa mga tigpaminaw sa Arangkada sa DYAB 1512, gisuwayan namo sa pagsuhid may mga politiko pa ba sa Sugbo ug ubang bahin sa nasud nga may delicadeza. Subo kong motaho ninyo nga di kaayo daghan ang among nakit-an. Ang kinabag-an hingpit nang nisalikway sa bisan unsang kaikog ni kaligdong.
Nagkauyon mi nga kon himuong sukaranan ang delicadeza, way mapili nilang Cebu City Mayor Mike Rama ug Kongresista Tommy Osmeña. Kinsa pulos nagpabaga pagsugod na og pangampanya bisan sa wa pa makapasaka sa ilang certificates of candidacy (CoCs). Bugtong nakapasar mao si Lea Ong sa Punta Princesa. Nga posibleng hilom pa kay way makinarya.
***
Nakapasar sa pagsuway sa delicadeza sa Probinsiya si Sugbo si Gubernatorial Candidate Jun-Jun Davide. Kinsa wa pa kapapilit og bisan unsang propaganda material bisan maoy labing una nga nakapasaka sa iyang COC. Sukwahi sa iyang kaatbang, si PJ Garcia, kansang dagway ug slogan hagbay rang gipanglansang sa hapit tanang poste sa probinsiya.
Hinaot nga paundayonan na lang gyong Davide ang iyang kaligdong. Nga di hinuon garantiya nga modaog siya. Ug hinaot nga makaamgo si Garcia nga di sulundon ang iyang gihimo. Nga mas mahulagway sa slogan nga “Pamintaha Jud.”
***
Laing nakapasar mao si Mandaue City Mayor Jonas Cortes. Nga malampuson nga nisalikway sa dunot nga kultura sa lapida nga gibilin ni kanhi mayor Teddy Ouano. Kansang dagway gipapilit sa tanang billboards ug posters sa kinatibuk-ang siyam ka tuig niyang pagtungkawo sa City Hall.
Hinaot nga, samang Davide, di matental si Cortes sa pagpamintaha sa pagpangampanya. Hinaot nga ang iyang pagtamod sa delicadeza wa lang manukad sa kakuwang sa lig-ong kaatbang. Ni sa gikatahong kauyonan nga di siya atbangan sa One Cebu.
Ug hinaot nga ang mga namintaha, manamin sa maayong buhat nilang Cortes ug Davide. Bisan ang delicadeza di garantiya sa kadaogan sa piniliay ni sa katakos sa pag-alagad, makaayo sa tanang hingtungdan kon ang mabuot nga mga botante moinsistir nga himuon ning usa sa mga sukaranan sa pagpili.
***
Email: leo_lastimosa@abs-cbn.com