Taphaw nga balaod

Nasukip ang libel provision sa Cybercrime Prevention Act of 2012 niadtong Enero ning tuiga. Si Senate Majority Floorleader Tito Sotto ang nisugyot sa probisyon. Gipasabot si Sotto sa main author sa balaudnon, si Senador Edgardo Angara, nga mahimong ipahamtang sa mga probisyon sa Revised Penal Code sa libel nga mahimo online. Sama nga duna nay mga kasong libelo nga nag-ung-ong sa mga hukmanan mahitungod sa kontrobersiyal nga posts sa Facebook ug ubang social media networks.

Way klaro sa transcript sa Senado nganong ang nipatigbabaw mao ang sugyot ni Sotto. Nga di abogado. Kay sa sukwahi nga sentimento ni Angara, nga kanhi nasudnong presidente sa Integrated Bar of the Philippines (IBP).

***

Hauka ba lang ang baruganan ni Angara? Mas determinado ba lang nga niduso sa iyang sugyot si Sotto? O, sama sa nangaging pagtuki sa mga balaudnon, gireserba nilang Angara ug kaubanan, nga mas nasuhito sa balaod kay ni Sotto, ang ilang pangisog alang sa mas  mahinungdanon nga mga isyu? Gawas nga naghunahuna nga di maayong apikihon ang ikatulong labing taas nga opisyal sa Senado, labi na kon nagkinahanglan sa tabang ni Sotto sa umaabot sab nilang mga balaudnon.

May nahunahunaan hinuon ko nga laing posibleng hinungdan nganong nagyangu-yango silang Angara ug kaubanan sa bisan unsang gipanulti ni Sotto.

***

Niadtong Enero ning tuiga, ang atensiyon sa mga senador wa masentro sa Cybercrime Prevention Act of 2012. Kon dili sa impeachment trial ni kanhi chief justice Renato Corona. Nga maoy gisunod ug gikahinaman sa kinabag-an sa katawhan.

Tingali mas nahigot ang ilang atensiyon sa mga lagda sa husay. O naglibog sa mga pasangil ug mga sumbalik pasangil gikan sa House Prosecution Panel ug sa mga abogado ni Corona. O nagsugod na pagpaniid unsay mas popular nga boto—absuwelto o konbikto. O sa lalis unsay labing maayong kolor sa ilang kapa isip senator judges.

***

Bisan unsa pay ilang raket niadtong Enero, way panagang ang mga senador ug mga kongresista nganong nakalusot gyong sugyot ni Sotto sa final version sa balaudnon. Kay ang bersiyon sa House of Representatives way libel provision. Kon nagtuman lang sa ilang trabaho, makabantay unta sa pagkasukip sa probisyon dihang gihusay nang duha ka nagkasungi nga bersiyon sa Bicameral Conference Committee.

Laing kahigayonan pagtul-id sa sayop mao ang ratification sa duha ka bay balaoranan. Nga maoy gikinahanglan sa di pa ikapada ang balaudnon alang sa pirma ni Presidente Noynoy Aquino sa Malakanyang. Tsamba ba lang nga nagkadungan og piyong ang mga mata sa mga kongresista, mga senador ug sa mga magtatambag sa presidente? O ingon ini gyud kataphaw ang proseso sa pagpanday sa mga balaod ning nasura?

***

Email: [email protected]