Paglaom sa Pamunoang Palma

Dasonan bang Cebu Archbishop Jose Palma ang sistema nga gihuptan sa iyang gipulihan nga si Ricardo Kardinal Vidal pagduma sa sex scandals sa pipila ka kaparian sa Artsidyosesis sa Sugbo? O ipahamtang ang iyang kaugalingon nga mga paagi?

Nagpakabana nga mga Sugbuanon nanghinaot nga mas makiangayon ang sistema ni Palma kay ni Vidal. Kinsa ilang gipasanginlan nga mas determinado nga nipahilom sa mga eskandalo. Kay sa paghatag og hustisya ngadto sa mga biktima sa, ug pagtino nga di na mapun-an ang, mga pangabuso sa pipila ka nasaag nga mga pari.

***

Alang sa mga nakalimot na, ang mosunod mao ang mga paagi ni Kardinal Vidal pagsulbad sa mga pasangil batok sa pipila ka pari:

• Healing priest nga gipasanginlang nakigpuyo sa usa ka babayeng minyo bisan sa pagsupak sa bana gipabilin sa iyang parokya;

• Kura paruko nga nipirma isip solemnizing officer sa iyang kaugalingong kasal igo lang gipalarga paingon sa Estados Unidos;

• Laing kura paruko nga gipasanginlan nga nanglugos og tinun-an nga babaye nakalingkawas sa prisohan human gipalihog sa artsidyosesis ang usa ka dakong politiko pag-areglo sa kaso; ug

• Mga pari nga gisumbong sa mga tinun-an nga nagbinastos nila igo lang gipamalhin og laing mga parokya, diin pipila nila nagpabadlong na sab.

***

Si Kardinal Vidal mismo ug iyang mga tigpamaba wa motubag sa bisan unsang pangutana mahitungod sa pagbinastos sa pipila ka pari. Ubang mga tinubdan nay nihunghong sa mga sakop sa media nga ang badlungong mga pari gipada sa rehabilitation center sa habagatang Sugbo. Kansang labing kusganong lakang mao ang pagpakaon sa mga pari og daghang kapayas.

Dagkong haligi sa simbahan nipasabot nga si Kardinal Vidal mahigugmaon sa mga pari kay nagnihit na sila pag-ayo karon. Gawas pa, ang pari bisan unsa kamakasasala di mahimoang laksian sa iyang pagka pari, busa kinahanglan nga luwason gikan sa hingpit nga kaalaotan. Bahala na unsay dangatan sa ilang mga biktima?

***

Ang pagpangunay ni Arsobispo Palma pagpahibawo sa pagka suspenso ni Msgr. Cris Garcia mahimong isipon nga maayong timaan. Apan igo lang siyang nipatuman sa sugo sa Vatican. Gawas nga nalangay og tulo ka buwan ang pahibawo. Ang kahilom ni Palma sa bag-ong kontrobersiya sa mga pari sa Minglanilla nakapatumaw sa pagduda nga wa siyay kalainan ni Vidal.

Apan ambot naikog ba lang ni Vidal, o nagpahimutang o nangita pa og buylo sa iyang kaugalingong sistema sa artsidyosesis, si Palma gikataho nga nagpaabot sa sunod tuig aron ipatuman ang hingpit nga lahugay sa kaparian. Nga maglakip sa pipila nga mao ray nagpulipuli pagduma sa labing dagko ug adunahang mga parokya. May sukaranan ang paglaom nga mas bukas ug mas makiangayon ang bag-ong pamunoan.

***

Email: [email protected]