Paglangoy batok sa baha

  Tudloan na og langoy ang mga tinun-an sa Grade 3. Kini kun maaprobahan ang balaudnon nga gipasaka ni Kongresista Angelo Palmones sa Agham Partylist. Matod ni Palmones usa ni sa labing epektibong paagi sa pagsagubang sa nagkasubsob ug nagkagrabeng mga baha dinhi sa ato.

 Si Palmones nipasabot nga di na kapugngan ang pagpulipuli sa grabeng uwan ug grabeng init tungod sa global warming. Kay di man kabatokan ang kinaiyahan, ang bugtong mahimo sa katawhan mao ang pagpalambo sa ilang pangandam ug pagpahaom sa ilang mga katakos alang sa umaabot nga katalagman.

* * *

 Naalarma ang mga sakop sa Kongreso pagkahibawo nga ang security aide ni anhing DILG secretary Jesse Robredo di hingpit ang katakos sa paglangoy. Nga posibleng maoy hinungdan sa kontrobersiyal nga kapakyas ni Police Senior Inspector Jun Abrazado pagluwas ni Robredo dihang nihagsa ang gisakyan nilang ayroplano sa kadagatan sa Masbate.

 Nikumpisal si Abrazado nga nawad-an siya og panimuot tungod sa kakalit ug kakusog sa paglugapak ug pagkabungkag sa ayroplano. Dihang nakamatngon og buot, wa na igkita si Robredo. May nangagpas nga nabugto ang iyang seatbealt maong wa mounlod uban nilang Robredo ug kaubanan. Nagtuo si Abrazado nga nilutaw siya tungod sa gisul-ob nga backpack.

* * *

 Maong giduaw nilang Palmones ug ubang mga kongresista ang Philippine National Police Academy (PNPA), ang opisyal nga eskuylahan alang sa kadagkoan sa kapolisan, sa Camp General Mariano Castañeda sa Silang, Cavite. Makapakugang ang ilang nahibaw-an:

 • Elective lang sa PNPA ang swimming lessons, sa ato pa, mahimong kuhaon apan mahimo ra sang laktawan sa mga kadete;

 •  Way bisan usa ka swimming pool, ni bisan unsang dapit nga kalangoyan, ang tibuok PNPA; ug

 •  60% sa mga kadete sa PNPA nagpuyo sa bukiran nga mga barangay ug kalungsoran, busa dako ang kahigayonan nga wa makasuway sukad masukad sa paglangoy.

* * *

 Gawas nga hingusgan ang pagtudlo sa paglangoy, gisugyot sab ni Palmones ang pagtukod og river patrol units sa kapolisan. Kini aron mapuno sa inadlaw nga mga gimbuhaton sa kapolisan ang paglawig sa mga sapa ug kabaybayonan sa inadlaw nilang pagbantay sa seguridad sa katawhan.

 Ning paagiha, gipanghinaot ni Palmones nga mas andam na ang kapolisan sa paglusad dayon og search and rescue operations sa mga biktima sa lawom ug lapad nga baha: Kay gawas nga mahimo na nga kabahin sa naandan nilang kahimanan ang mga bangka ug may kasaligan nang mga tigpaniid ang local government units batok sa kahugaw ug ilegal nga mga istruktura sa mga agianan sa tubig, masuhito na sab ang mga polis sa mga ruta ug tanang likuliko sa mga sapa sa ilang mga teritoryo.  

* * *

Email: mailto:[email protected]