Dul-an sa duha ka dekada nang nilabay, naghilashilas ko pagtungkawo sa Bureau of Customs, uban sa pagtuo nga masakpan ang binuang nga mga transaksiyon ug maibanan ang mga pangurakot. Mao pa lang gani pagtaak nako sa karaang Customs building (nga Malakanyang sa Sugbo na karon), gitanyagan dayon ko sa opisyal sa customs og Mac laptop sa ubos kaayong presyo nga P25,000.
Wa nako dawata ang Mac, nga niadto balor og P120,000. Kay gawas nga di na kong kasaway sa opisyal madiktahan na sab ko niya unsaon pagtuman ang akong trabaho.
***
Nga mahimong mao say nahunahunaan ni Kongresista Tommy Osmeña dihang gitanyagan sa duha ka mahalong sakyanan ni Michael Gleissner sa Bigfoot Industries. Maong inay modawat gipapalit na lang sa iyang maguwang nga si Minnie. Apan siya ra gihapoy nigamit.
Kon pareha pa mi og panghunahuna ni Tommy, gipapalit sab unta nako sa akong higala ang Mac, pinahimuslan ang ubos kaayong presyo. Maayo na lang nga, sama nako, di interesado ang pipila ka nagpakabana nga mga tigpaminaw sa DYAB nga nikuyog nako pagbantay sa customs. O tingali, lahi nilang Tommy ug Minnie, di mi kuwartahan. Ni mapahimuslanon.
***
Atubangan sa mga kasong kriminal nga gipasaka ni Cebu City Mike Rama batok niya, mahimong gamiton ni Osmeña ang mosunod nga mga panagang:
• Nga di siya maoy nipalit sa mga sakyanan ni Gleissner kon dili si Minnie, nga usa ka pribadong indibiduwal;
• Nga way makabuot ni Gleissner kon laslasan pag-ayo ang presyo sa iyang duha ka sakyanan; ug
• Nga, inay sawayon, angay siyang pasidunggan sa paggamit sa duha ka pribadong sakyanan alang sa opisyal nga katuyoan.
Apan ang kadako sa diskuwento (sa tinamban nakong kuwentada niabot og kapin sa P3 milyones) ug ang dungan nga mga transaksiyon tali ni Gleissner ug sa City Hall mahitungod sa South Road Properties (SRP) nakapasamot sa pagduda nga di inosente ang pagbaligya.
***
Pakyas ang akong tahas sa customs. Kay ang binuang nga mga transaksiyon wa himoa sa bukas nga hawanan sa ilang mga buhatan. Kon dili sa ngitngit ug tago nga mga suok sa luho nga mga kan-anan ug mga imnanan sa palibot sa customs building. Nga di ikatandi sa kalamposan ni Osmeña pagdani sa labing dagkong mga negosyante sa SRP human sa unang mga adlaw nga mora’g si Gleissner ray interesado.
Apan pasaligan nako si Osmeña nga di nako ibaylo sa bisan unsang materyal nga kadaogan ang kamalinawon sa akong konsiyensiya. Kon natental pa sa Mac, mahimong guba na. Ug mahimong wa pa kong kahuman og bayad sa wa kinahanglana nga utang kabubut-on hangtod karon.
***
Email: leo_lastimosa@abs-cbn.com.