Labing menos P3.5 milyones ang naggasto ni Michael Gleissner, tag-iya sa Bigfoot Global Solutions, sa pagpalit didto sa Estados Unidos ug pagda dinhi sa Sugbo sa duha ka V6 Dodge Charger niadtong 2009:
• Balor og tag-P1.2 milyones ang matag usa, segun sa websites sa mga kompaniya nga namaligya sa maong mga sakyanan tulo ka tuig ang nilabay; ug
• Kapin sa P1 milyon ang nabayad ni Gleissner nga buhis sa Bureau of Customs sa pagdunggo sa mga sakyanan sa pantalan sa Sugbo, segun ni Assistant Director Arnel Tancinco sa Land Transportation Office (LTO 7).
***
Gi-detalye nako ang presyo ug buhis sa duha ka sakyanan aron makumbinser ka nga di tinuod nga gibaligya ni Gleissner ang mga sakyanan ngadto ni Minnie Osmeña, maguwang ni Kongresista Tomas Osmeña. Segun sa kopya sa deed of sale nga gisumiter ni Osmeña ngadto ni Tancinco, P200,000 ra ang gipaningil ni Gleissner sa matag sakyanan.
Sa ato pa, P400,000 ra ang halin. 11% ra sa kinatibuk-ang gasto ni Gleissner. 16% ra sa presyo sa mga sakyanan sa wa pa ang buhis. Wa ra ganing katunga sa iyang nabayran nga customs duties. Baligya o suburno?
***
Unang nabantang sa mga Sugbuanon ang kontrobersiyal nga mga sakyanan niadtong Marso 2009. Nagpaabot nang daan ang mga sakyanan dihang nitugpa si Kongresista Osmeña sa Mactan Cebu International Airport gikang nagpa-opera sa US. Niadtong higayona, gipahibawo ni Osmeña nga ang duha ka sakyanan donasyon ni Gleissner alang sa Cebu City government.
Sa niaging semana lang giusab ni Osmeña ang kasayuran: Nga wa diay niya dawata ang mga sakyanan; gawas pa, nausab ang hunahuna ni Gleissner kay kutob na lang sa 2010 ang iyang termino pagka mayor. Maong, ni Osmeña pa, gibaligya na lang ni Gleissner ang mga sakyanan ngadto ni Minnie. Ang wa niya itug-an mao nga baratilyo kaayong transaksiyon.
***
Kolorum ang duha ka sakyanan sukad sa pagdunggo nila sa pantalan sa Sugbo niadtong 2009 hangtod nga narehistro sa LTO 7 niadtong Hunyo ning tuiga. Sa ato pa, tulo ka tuig nga gikabay-an ni Osmeña ang mga sakyanan nga way rehistro. Way kalainan sa kolorum nga taxi ug ubang sakyanang pamasahero.
Apan way nakaako pagdakop sa duha ka sakyanan. Kinsa man tuod ang mangahas sa pagpara ug pagsusi? Nga nagbansiwag man ang logo sa Dakbayan sa Sugbo ug ang marka sa kapolisan? Gawas pa, way mangisog sa pagpangutana nganong way mga plaka ang duha ka sakyanan sa niaging tulo ka tuig. Labi na niadtong mga higayon nga si Osmeña mismo ang nagtungkawo ug gilamian pag-ayo nga nagsakaysakay.
***
Email: leo_lastimosa@abs-cbn.com