Mga alalay ni Rama

Dihang akong gipangutana si Cebu City Mayor Mike Rama parte sa suwat ni Inayawan Landfill Head Randy Navarro, nga nagpahibawo niya unom ka buwan nang nilabay sa dakong anomaliya sa kontrata nga iyang gisudlan uban sa usa ka pribadong kompaniya nga nipasalig paghakot sa basura sa Inayawan ngadto sa Consolacion, gipasa ko niya ni City Administrator Jose Marie Poblete. Kay, niya pa, wa siya kabasa sa suwat.

Apan si Poblete, sa iyang bahin, wa motarong pagtubag sa suwat ni Navarro. Gipanalipdan niya ang supplier, ang Armed Builders and Supply. Ug gibalik ngadto ni Navarro ang responsibilidad sa pagtino nga mapatuman ang kontrata nga gipirmahan sa mayor.

***

Kaluoy ni Navarro. Igo lang nagtuman sa iyang trabaho. Niadto pang Enero, sa pagsugod pagpatuman sa P24 milyones nga kontrata, nga nagsige siya og tawag sa atensiyon sa Armed Builders nga daot ang usa sa duha ka heavy equipment nga ilang gipasalig. Apan giisnab siya sa kontraktor.

Maong niadtong Marso ning tuiga, nagpalaban na siya nilang Rama ug Poblete. Gihatagan sab og kopya sa iyang suwat silang Cebu City Councilor Edu Rama, tsirman sa Committee on Public Services, ug Rolly Ardoza, hepe sa General Services Office. Nakatag-an ka, way bisan usa nila nga nikihol sa pakitabang ni Navarro.

***

Mao nga tuguting mobalik ko sa mayor. Giunsa man diay niya pagduma ang dakbayan? Gihangop sa mga Sugbuanon ang iyang pasalig nga gamiton ang political will aron pagtak-op sa landfill sa Inayawan. Siyay nipadayag og hingpit nga pagsalig ug suporta ni Navarro sa pagpatuman sa tahas.

Tinuod bang wa kabasa si Rama sa suwat ni Navarro? O wa lang katugkad sa kadinalian sa mensahe? Nganong igo ra mang nagpasalipod sa saya ni Poblete, inay magsusi kinsay nagtago gikan niya sa tinuod nga problema sa basura: Nga gamay ra ang mahakot sa Consolacion ug nga ang labing dakong bahin nahibilin nga nagtipun-og, nabukid ug nangalisbo sa Inayawan?

***

Akong gipangutana si Rama sa mga pasangil nga ang utok sa kontrata uban sa Armed Builders ug susamang mga transaksiyon mao ang iyang paryente nga si Rene Mercado. Ug nga napugos siya paglingiw sa mga pasangil sa kahiwian kay nagkinahanglan siya og dakong kuwarta aron ikasakbang sa makinarya ni Kongresista Tommy Osmeña sa piniliay sunod tuig.

Gipasaligan kong Rama nga wa siya mangawat. Nanumpa sa nangamatay niyang mga ginikanan nga di niya tugtan ang anomalusong mga transaksiyon. Apan wa gyud siya motuki sa mga pasangil batok ni Mercado ug sa Armed Builders. Ug bisan batok sa iyang amigong si Peter Dy, kansang PLD Construction gipasanginlan wa katiwas paglimpiyo sa nabara nga sapa sa Tejero apan nakakobra sa tibuok bayad.

***

Email: [email protected]