Pag-usab sa mga institusyon. Di lang sa kasamtangan nga mga tagduma. Mao ni sentro sa mga paningkamot ni DILG Secretary Jesse Robredo sa kataposan niyang mga adlaw. Ug, sa akong tan-aw, mao ni usa sa mga hinungdan sa pagtudlo ug pagpapanumpa ni Presidente Noynoy Aquino sa bag-o ug labing unang babaye nga pangu sa Korte Suprema.
Si Chief Justice Maria Lourdes Aranal Sereno gitudlo di lang tungod sa iyang kaligdong ug katakos. Kon dili tungod sab sa lahutay. Magpabiling tagduma sa labawng hukmanan human mapupos ang termino ni Aquino sa 2016, human mokanaog ang presidente nga mosunod niya sa 2024 ug pila ka adlaw human sa termino sa sunod pa gyong presidente sa 2030.
* * *
Human sa mapanagan-on nga kampanya sa kausaban sa unang mga buwan sa iyang pamunoan, tungod sa sibaw nga kabalaka sa “landmines” o mga lit-ag nga gibilin sa nangalisbo nga pamunoan ni kanhi presidente Gloria Arroyo, nakabuylo nang mga paningkamot pagtarong sa burukrasya. Nga, salamat ni anhing Robredo, niabot na sa pagpangita sa labing tarong nga mga tagduma sa mga lalawigan, dakbayan, kalungsoran ug kabaranggayan.
Unsay mahitabo sa makiangayong kausaban nga madaog ni Aquino sa iyang pagkanaog sa Malakanyang upat ka tuig gikan karon? Unsay dag-anan sa kausaban kon, simbako, kawatan ang mopuli niya? Ang pagpalig-on sa mga institusyon maoy gilaomang makapalungtad sa kausaban bisan kinsay sunod nga presidente.
* * *
Di magnihit sa mga kontrobersiya ang pagkatudlo ni Sereno. Siyay maisugon nga nibisto sa mga maniobra ni kanhi chief justice Renato Corona pagpalayas unta ni Arroyo ngadto sa gawas sa nasud sa niaging tuig. Maong ang bisan unsang kausaban nga pasiugdahan sa mosunod nga mga adlaw mahimong hubaron nga pagpanggukod sa nahibilin nga mga gaway nilang Arroyo ug Corona.
Karon pa lang gipasanginlan na sa militanteng mga pundok nga manalipod sa mga interes sa pamilya ni Aquino sa Hacienda Luisita. Apan bahaw na ning isyuha. Nipabor si Sereno sa pag-apud-apod sa asyenda sa mga mag-uuma. Ug nakabuylo nang Malakanyang pagpatuman sa hukom sa Korte Suprema ug sa linugwayang Comprehensive Agrarian Reform Program, nga gikuyawan nang mga kawani sa Department of Agrarian Reforms nga wa nay trabaho sa 2014.
* * *
Ang katakos ni Sereno sa duha ka tuig niyang pagsilbi sa Korte Suprema nasumpay sa dalayegon niyang mga nahimo:
• Gradwado sa Kamuning Elementary School ug Quezon City High School ug scholar sa gobyerno ug pribadong sektor sa pagkuha og Economics degree sa Ateneo de Manila University ug pagkahimong valedictorian sa University of the Philippines College of Law sa 1984;
• Sa pangedarong 38, natudlong legal counselor sa World Trade Organizations Appellate Body Secretariat sa Geneva;
• Usa sa The Outstanding Women in the Nation’s Service (TOWNS); ug
• Sa pangedarong 39, siyay bugtong babayeng sakop sa 1999 Preparatory Commission on Constitutional Reform.
* * *
Email: leo_lastimosa@abs-cbn.com