Way Catholic vote. Napamatud-an ni sa makadaghan na uyamot nga higayon sa nangaging mga piniliay. Ang makabungog nga mayoriya sa mga Katoliko ning nasura takos untang mopadaog og mga politiko nga hingpit nga niggakos sa mga pagtulon-an sa Simbahang Katoliko. Sayon ra unta nilang mapalayas si bisan kinsa nga mangahas paghupot og sukwahi nga panghunahuna.
Apan napakyas ang mga pagsuway sa kaparian paggamit sa influencia sa simbahan sa lokal ug nasudnong mga piniliay. Namunbon ang mga politiko nga ilang gitugpo. Ang ilang mga sinalikway maoy nakatungtong sa gahom. Wa hinuon ning kapugong sa pagpanginlabot sa kaparian sa mga piniliay. Ug wa ni kapapas sa kahadlok sa mga politiko sa kadagkoan sa simbahan.
* * *
Maong maglisod og lusot ang kontrobersiyal nga Reproductive Health (RH) bill sa duha ka bay balaoranan. Di tungod kay nahudlat ang mga senador ug mga kongresista sa pasidaan ni Ricardo Kardinal Vidal ug ubang kadagkoan sa Catholic Bishops Conference of the Philippines (CBCP) nga ilusad ang lapad nga kampanya batok sa ilang kandidatura.
Kay nahibawo sila nga ang makapadaog nila di ang wali sa kaparian kon dili ang ilang mga proyekto. Maong kon mahimo ibaligya ang ilang kalag aron lang pagkuha sa tambok nilang pork barrel. Apan nganong mokurog mang mga politiko sa direkta nga engkuwentro sa kadagkoan sa simbahan?
* * *
Dakong politiko sa Sugbo giduol sa kadagkoan sa artsidyosesis ug gihangyo nga motabang pagpalingkawas sa pari nga gipasanginlang nanghilabot og batan-ong babaye sa iyang parokya. Lig-on ang mga ebidensiya batok sa pari ug isog nga nibarug ang mga paryente sa biktima.
Apan ang politiko maoy nitanyag pagbayad og dakong kantidad sa pamilya sa biktima ug trabaho alang sa ilang kaparyentihan bugti sa pagsibog sa kasong kriminal. Gisukmatan ang politiko sa iyang mga paryente nga apil sa mga nitabang sa biktima. Iyang tubag: Daghan ug dagko uyamot ang iyang kasal-anan busa di mahimong balibaran ang hangyo sa mga haligi sa simbahan.
* * *
Laing politiko nahinayak na pagpatuman sa iyang proyekto. Apan kusganong nisupak ang pipila ka opisyal sa simbahan. Nahinayon ang proyekto apan gibalhin og laing dapit. Katin-awan sa politiko: Hinog nang akong panuigon, nganong tuyoan man gyud pagpakig-away ang mga gitahasan pagluwas sa atong kalag?
Sunod higayon nga may mga politiko nga maghilas-hilas pagsukol nila, di na kinahanglang manghudlat pa silang Kardinal Vidal ug kaubanan nga mangampanya pagsalikway nila sa piniliay. Mas epektibo kon igo na lang kutluon ang mga bersikulo sa Bibliya nga nagtumbok sa simbahan nga iya sa Ginoo ug sa kaparian nga mga representante ni Kristo ug nga si bisan kinsang mangahas pagsupak sa ilang mga pagtulon-an mahitumpawak sa nagdilaab nga impiyerno. Diin way kinutoban ang pagminatay ug pagkagot sa mga ngipon.
* * *
Email: leo_lastimosa@abs-cbn.com