Apil ang tihik

Sa talagsaong mga higayon nga makasuroy ko sa shopping malls, modiretso dayon ko sa electronic shops.  Malingaw kong mosusi sa mga desinyo, gidak-on, katakos ug presyo sa nagkalainlaing gadgets.  Hangtod nga akong naamgohan nga mas sayon ang pag-atang sa labing bag-ong laptops ug tablets online kay sa pagsungasong sa gubot kaayong trapiko.

Karong bag-o, nibalik ko og suroy sa malls pagpangita sa labing gagmay ug barato nga MP3 players.  Apan nabawo ko.  Wa nay bisan usa sa suki nakong shops nga namaligya og MP3 players.  Mga nagbantay nipasabot nga wa nay mamalit og standalone nga MP3 players.  Kay naapil na sa mobile phones, laptops, tablets, digital cameras ug bisan sa mga relo.

***

Maong nahinangop ko dihang nakapalit sa usa sa mga tindahan sa Bacolod og gamay ug nipis kaayong MP3 player nga P250 ra.  Susama og porma sa 4th generation sa iPod Shuffle apan 10% ra ang presyo.  Mas mahal ang 2 gigabytes nga micro SD card kay way built-in nga memory.  Apan gitugot sa tindera og P500 ang card ug player.

Hapit na usa ka semana na ni nakong nagamit.  Wa ko magpaabot nga molahutay ni og dugay.  Apan lingaw na ko.  Bisan duha ka oras ra ang baterya (5 minutos ra sab hinuon ang charging), way shuffle ug haskang dugaya nga maka-download og mga kanta.

***

Dul-an sa 1,000 ka kanta ang masud.  Kay laay mang magbalikbalik og paminaw nga mao rang mga kantaha ang magsunod, akong gipili ang albums nga mas nindot paminawon sa iyang kinatibuk-an, sama sa uwahing recordings dayong bungkag sa The Beatles, ug sa koleksiyon sa 500 ka labing bantogang mga awit sa tanang panahon nga gilista sa Rolling Stone Magazine.

Nangandoy kong makapasud og mas daghan pa nga di masakripisyo ang kalidad sa tingog.  Apan sa akong kasinatian kanunay nga mas daghan ang kanta nga masud kay sa mapaminaw.

***

Mas daghang kanta ang napasud sa duha ka 16 gigabytes nga micro SD cards sa akong telepono.  Di hinuon makabuylo og paminaw tungod sa text messages ug voice calls gikan sa mga tigpaminaw ug mga kauban sa trabaho.  Mga batan-on maoy makagiya natong mga hamtong sa labing maayong mga paagi pagkonsumo sa MP3, video ug text files ug ubang media content.

Di hinuon hulga sa nasudnong panaghiusa ang pagbutang og ear phones samtang naghimo sa inadlawng gimbuhaton.  Samang wa maibani ang mga tigpaminaw sa radyo, gani niusbaw pang halin sa legal nga MP3 files.  Ang bag-ong mga teknolohiya, inay mopahiyos, nipalapad sa merkado sa pagkonsumo sa nagkadaghang mga produkto.  Bisan alang sa tihik nga mga konsumidor nga ganahan og libre o 10% ra sa naandang presyo ang andam nga bayran.  

***

Email: [email protected]