Pagkanaog namo sa ayroplano gikan sa Bacolod City, nisugat sa mga pasahero ang luhong sakyanan nga may license plate nga “Paul V.” Nagduda ang kaubanan nakong mga pasahero ko nga ang sakyanan iya sa general manager sa Mactan Cebu International Airport (MCIA) nga si Engr. Nigel Paul Villarete. Ambot mao ba tong sakyanana nga gipasanginlang nitabok sa runway samtang may nagdangadanga nang ayroplano.
Si Villarete ba ang nagbutang sa iyang ngan sa plaka sa iyang sakyanan? Nakalimot ba siya nga hagbay rang gidili sa Land Transportation Office (LTO) ang paggamit sa vanity plates? Gawas lang sa pipila ka dagkong opisyal sa gobyerno? Ug nga wa siya maapil sa mga gitugotan pagtabon sa naandang license plates?
* * *
Kun si Villarete ang tag-iya sa “Paul V.” nga sakyanan, nga sayon kaayong tuohan kay kinsa may laing opisyal nga mangahas pagbahas-bahas sa iyang sakyanan samtang nagbaktas ang mga pasahero gikan sa ayroplano latas sa tarmac paingon sa arrival terminal, unsa may nasud sa iyang bakukang?
Nagtuo bang malipay ang mga pasahero sa iyang paagi paghangop nila? O igo lang niwarawara alang sa tanang hingtungdan, simbako may pipila nga nangahas sa paghikalimot, kinsa na ang bag-ong hawod sa tugpahanan? O natakdan na sa kagaw sa mga politiko sa di mapugngan nga kahigwaos pagsangyaw sa ilang ngan? Mga hulagway na bang Villarete ang sunod nga ibandera sa MCIA?
* * *
Ubos sa pagduma ni Villarete, gihukasan na gyod sa tanang pagpaka-aron-ingnon ang lagda nga nipabor sa mga adunahan ug niapiki sa kabos nga mga pasahero sa ayroplano:
• Ang pribado rang mga sakyanan ug ang may sugatong mga pasahero nga mga sakyanan sa gobyerno, may vanity plates man o wa, ang ilang gitugotan nga makahunong sa tungod sa ganghaan sa arrival terminal;
• Ang yellow cabs, nga mas taas ang plitehan, gitugotan sa pag-atang og mga pasahero sa unahan; apan
• Ang kinabag-an sa mga pasahero, nga igo rang makaabot sa plitehan sa puti nga taxis, ilang gipatungas, gipalikuliko ug gipasangko hangtod sa departure terminal aron makalinya alang sa mas baratong kasakyan.
* * *
Unsay mensahe nga gustong ipadangat ni Villarete ngadto namong kabos nga mga pasahero? Nga di mi magpatugatuga og sakay og ayroplano kun way sakyanan nga makasugat namo, o kun wa mi igong kuwarta nga ikaabot sa pinaburot nga plitehan sa yellow cabs? Nga mirisi ming mga nag-atang lang sa mga promo sa mga kompaniya sa ayroplano, busa angay ming mabughat og sinakwatay sa among mga bagahe paingon sa mas gipalayo niyang puti nga taxis?
Ambot unsa nay nahimong Villarete sukad sa pag-asumir sa MCIA, apan mangahas ko pagpahibawo niya nga kaming kasarangang mga pasahero way nakitang kausaban. Gawas sa gubaong aircon. Ug nagbansiwag nga vanity plate.
* * *
Email: leo_lastimosa@abs-cbn.com