Helmet Law

Kon tinuod nga ang mga sakop sa City Traffic Operations Management (CITOM) dili moapil sa pagpatuman sa pagsul-ob og tukma nga “crash helmet” malantawan nako nga dili kini hingpit nga mapatuman dinhi sa dakbayan sa Sugbo.

Gipahibalo ko ni Sylvan “Jack” Jakosalem nga maoy chairman sa CITOM Board nga ang dul-an sa 300 ka traffic enforcers dili nila paapilon sa pagpatuman sa kampanya.

Sa ato pa, ang mga sakop ra sa Land Transportation Office (LTO) maoy mopatuman sa lagda nga gilatid sa Republic Act 10054 nga naglatid nga kadtong mga mosakay og motorsiklo magsul-ob gayud sa tukma nga crash helmet.

Bitaw, binuang na usab tingali kining giingon nga bisan kadtong mga mahalon nga helmet nga gikan gayud gani sa laing nasud dili aprobahan sa Department of Trade and Industry.

Unsa gud ni, pilion ra diay kadtong gihimo sa mga gipaboran ninyo nga kompaniya?

Ako isip deputized agent sa LTO, dili na kinahanglan nga pangitaon pa kon ang helmet nga gisul-ob sa nagsakay og motor duna bay sticket nga “PS” kon Product Standard ug “ICC” kon Import Commodity Clearance.

Alang kanako, basta ang porma susama sa gimando sa balaod, dili na kinahanglan nga pabayron pa ang mga tag-iya’s helmet og sticker. Nadunggan nako nga mahal ra ba diay ang pagpabayad diha sa DTI.

* * *

Hinoon, nalantawan nako mahadlok gihapon ang mga drayber og motor bisan og dili moapil ang CITOM sa kampanya, ug motuman gihapon sila sa gilatid sa balaod kay, dili panghambog, mas mopatuman man gayud sa balaod ang LTO kay sa CITOM enforcers.

Sa LTO walay daghang “kuskus-balungos” isyuhan dayon og Temporary Operators Permit (TOP) ang madakpan, dili sama sa ubang traffic enforcers nga adto pa sa daplin sa karsada maghung-hongay.

Kini man maoy gusto unta nako ipausab nga estelo sa mga traffic enforcers. Ngil-ad kaayo kini tan-awon sa publiko. Dihay traffic enforcers kaniadto didto sa Salinas Drive, nagbarog sa karsada.

Pag-agi sa PUJ, milabang ug gitunol ang lisensya sa drayber. Ngano man to? Giuli? Nganong giuli man? Gipangutana nako ang drayber kay diha man ko makasakay sa atubangan nga lingkoranan.

Gitunolan diay niya’g kwarta ang traffic enforcer ug ang lisensya gipabilin ra kay kon dunay mangutana, ipakita man kini niya ug ipatoo nga iyang gisakmit. Mao na diha kon dunay sekreto nga sabot-sabot.

* * *

Husto si Kongresista Eduardo Gullas (Cebu’s 1st District) sa iyang panglantaw nga lig-on kaayo sila kon mag-alyansa ang tulo ka partido nga mao ang Nacionalista, Liberal ug ang National People’s Coalition.

Si Gullas nga sakop sa Nacionalista Party executive committee nakapanglantaw nga lisud pukanon ang ilang mga kandidato kay ang tulo ka partido magtinabangay man alang sa ilang kadaugan.

Gihandum ni Gullas nga si kanhi Presidente Manuel Roxas, apohan ni LP chief ug karon Transportation Secretary Mar Roxas, milansar pagka presidente ubos sa NP kaniadtong 1946 sa wala pa niya mugnaa ang Partido Liberal.

Wala masayop si Gullas nga ang panag-alyansa sa NP ug LP, ingon man sa Nationalist People’s Coalition (NPC), usa ka nindot nga kalamboan sa politika sa atong nasud.

Maghugpong sila aron “bangga-on” ang United Nationalist Alliance (UNA) nga gipangulohan ni Vice President Jejomar Binay.

Ang NP nangayo og upat ka “slot” alang sa pagka senador.Ang report duha niini maglakip nila ni Las Piñas City Congressman Cynthia Villar ug Senador Alan Peter Cayetano.

Posible usab nga maapil sa line-up si kanhi senador Loren Legarda.

Sa Nationalist People’s Coalition akong nadunggan nga si Loren iapil nila sa tulo ka “slot” uban ni senador Francis Escudero. Si Valenzuela City Mayor Sherwin Gatchalian posible nga maoy mabutang sa ikatulo nga pwesto.

Si Loren ug Chiz daghan og maayo nga binuhatan sa senado ug si Mayor Gatchalian gidayeg usab sa ubang mayor kay siya gani ang gipili nga vice chairman sa League of Cities in the Philippines.

Ang liberal nagtan-aw karon sa mga lig-on nila nga sakop nga iapil sa combined slate.

Napanglantawan ni Kongresista Gullas nga ang eleksyon tali sa (NPC-NP-LP) coalition batok sa United Nationalist Alliance (UNA) usa ka mabulokon.