Way unay

Ang transport groups di angayng awayon.  Kay sama sa mga pasahero biktima sab sila sa way kinutobang kahangol sa higanteng mga kompaniya sa lana ug sa taphaw nga mga lagda sa gobyerno.  Apan ang postura sa kadagkoan sa transport groups karong bag-o nameligro nga mopadako sa kang-a tali nila ug sa mga pasahero, nga maoy gisaligan sa ilang panginabuhi.

Dihang nagsige og saka ang presyo sa lana sayo ning tuiga, ang transport groups labihang apuradoha nga nipasaka sa ilang plitehan.  Karong nagsige na sab og tidlom ang presyo, daghan na sab kaayo sila og palusot sa paghikaw sa makiangayong bahin sa mga pasahero sa mga benepisyo sa pagbarato sa lana sa merkado sa kalibotan.

* * *

Kahinumdom pa ba mo sa pag-insistir sa transport groups nga umentohan gyong minimum nga plitehan sa public utility jeepneys (PUJs) gikan sa P7.50 ngadto P9 sa unang lima ka kilometro bisan nagsugod na og kanaog ang presyo sa lana?

Ilang kadagkoan niingon nga di nila bakwion ang petisyon.  Kay tandugon ang kalibotanong merkado.  Nahadlok sila nga kasamtangan lang ang pagtidlom sa presyo.  Mao nga ibangil na lang nilang daan ang ilang petisyon alang sa P1.50 nga umento sa plitehan.  Alang sa sunod nga hugna sa paglayat sa presyo sa krudo, gasolina ug auto-LPG.

* * *

Mas dakong binuang ang ilang pagsupak karon sa mga petisyon paglaslas sa plitehan sa PUJs ug taxis:  P1.50 nga us-os gikan sa P7.50 karon ngadto sa P6 sa PUJs ug P10 nga laslas sa flagdown rate sa taxis gikan sa P40 karon ngadto na sa P30.

Matud sa PUJ ug taxi operators di sila makapakunhod sa plitehan kay nimahal ang ubang gastohan sa ilang operasyon, sama sa ligid ug mga piyesa sa mga sakyanan.  Napakyas hinuon pagmatuod nga napapas ang dakong ginansiya sa inadlaw nilang konsumo sa lana kay matag adlaw sab silang nag-ilis og mga ligid ug mga piyesa.

* * *

Wa ta manghudlat sa transport groups.  Apan gikinahanglan nila ang pagpaluyo natong mga konsumidor sa kampanya pagpanalipod sa makiangayon nilang mga interes.  Kinahanglan ta nga maghiusa.  Di ta angay nga mag-unay.  Kay managsama tang mga biktima sa panagkonsabo sa gobyerno ug mga kompaniya sa lana.

Apan ang ilang paugat sa plitehan, ang ilang pagdumili paghatag og regular nga suholan ug mga benepisyo sa mga drayber ug mga konduktor sa buses ug ang ilang pagdaugdaog sa mga pasahero pinaagi sa depektuso ug kagang-kagang nilang mga sakyanan, maka-islag sa sektor nga kinahanglang magpaluyo nila.  Aron kahatagan og makiangayon nga alternatibong mga panginabuhi kon maligsan na sila sa mass transport system, nga hagbay ra untang gipatuman, ug sa pamolitika sa mga ruta sa mga politiko, nga hagbay ra untang gihinginlan.  

* * *

Email:  [email protected]