Nakatiwas gyud ko. Sa labing unang unom ka kilometro nga lumba sa dagan nga akong giapilan. Mas daghang lakaw kay sa dagan. Nisanting ang akong tuhod. Nihuot ang akong sapatos. Nagsige og kahagtos ang akong liston. Nag-abot ang akong ginhawa. Apan nakaabot gyud ko sa finish line. Human sa usa ka oras ug lima ka gutlo.
Bisan sa tanang panagana, nahinayon ko pag-apil sa Kapamilya Run, usa sa highlights sa tibuok buwan nga pagsaulog sa ika-17 nga anibersaryo sa DYAB Abante Pa, Bisaya! Bisan pagmata nako maoy pag-unos, pahinumdom nga wa pa hingpit makabiya sa nasud ang bagyong Butchoy. Gumagawas na apan nakapasamot sa kiat sa habagat.
* * *
Nga nakapasamot sa katugnaw sa kadlawon sa pagsugod namo og tapok sa The Piazza sa ParkMall sa Dakbayan sa Mandaue. Sayong nakaabot si Mayor Jonas Cortes. Maong nahinabi pa ni Ferdinand Manus sa DYAB ug nakaluwat pa og mensahe sa entablado sa wa pa mopabuto sa starting gun alang sa 12 ka kilometro nga lumba.
Daghang balita si Mayor Cortes dihang nakabiya na ang dul-an sa libo ka half-marathoners: Apil nang pagtukod og duha ka dagkong ospital—ang una sanga sa usa sa labing luhong tambalanan sa Dakbayan sa Sugbo ug ang ikaduha pabarugon sa usa sa labing dagkong unibersidad sa Metro Cebu; ug buwag nga mga proyekto sa duha ka labing dagkong developers sa nasud.
* * *
Way uwan sa kinatibuk-an namong kalihokan. Ang baga nga dag-om nakatabon sab sa adlaw maong wa mapagtong sa init ang mga nanagan. Diha pa nagsugod og pakita ang adlaw nga nahuman na mi og pasidungog sa mga mananaog.
Labing gipakpakan nga pasidungog, gawas sa mga medalya ug cash prizes sa mga nanghawod sa dagan, mao ang Special Kapamilya Award alang sa Pamilyang Yu nga nagkuyog og sugod ug human sa dagan ug ang paghatag og tinuyong mga gasa sa 17 ka mga amahan nga nangapil sa lumba atol sa Father’s Day.
* * *
Karong human nang lumba, mosunod ang mas lisod nga gimbuhaton: Ang pagtukod og classroom alang sa mga tinun-an nga labing naigo sa bagyong Sendong niadtong Disyembre ug sa bangis nga linog niadtong Pebrero sa Negros Oriental.
Human maihap ang kinatibuk-ang kita sa Kapamilya Run, magpatabang mi sa Departamento sa Edukasyon (DepEd), lokal nga mga opisyal sa Negros Oriental ug mga ginikanan ug mga tinun-an pagtumbok sa labing haom nga dapit nga tukoran sa proyekto. Kon di paigo ang kuwarta, magpatabang mi sa ABS-CBN Foundation pagtuman sa saad nga hinabang.
Hinaot nga maibanan og diyutay ang pamaol sa mga nanagan tungod sa dako uyamot nilang tampo pagpagaan sa kalbaryo sa mga biktima sa katalagman nga determinadong naningkamot paghimo og lab-as nga sinugdanan.
* * *
Email: leo_lastimosa@abs-cbn.com