Si Cebu City Mike Rama gipasanginlan nga nitanyag og kanta. Inay mosugyot og sulbad sa nag-ung-ong nga demolisyon sa kabalayan sa San Miguel, Apas, Cebu City. Nahitabo ni sa hinapos nga bahin sa 2010 dihang nagpanon ang mga molupyo sa City Hall aron pagpangayo sa iyang tabang.
Si Atty. Benjamin Militar, abogado sa mga molupyo, nikutlo ni Rama nga nagkanayon, “Di ta maghisgot og problema kay matiguwang ta. Manganta na lang ta!” Namauli ang mga molupyo nga naglibog mapanalipdan ba sila sa mayor. Atubangan sa nag-ung-ong nga demolisyon karong semanaha, niingon si Militar, nakumbinser ang iyang mga kliyente nga way natabang nilang kanta ni Rama kapin sa tuig ang nilabay.
***
15 ka tuig nang nag-ung-ong ang kaso sa pagpanag-iya sa 4.7 ka ektarya nga luna. Si Regional Trial Court Judge Soliver Peras mao nay ikaupat nga huwes nga niduma sa kaso. Sa kinatibuk-ang husay, wa tuguti ang mga molupyo nga manginlabot. Kay ang prosekusyon niinsistir nga ang maigo sa kaso mao rang Armed Forces of the Philippines ug Philippine National Police.
Wa magpabaya ang mga molupyo. Sukad sa sinugdanan, nagsige na sila og awhag nga paapilon sa kaso. Apan gibabagan sila sa prosekusyon ug wa sila paminawa sa korte. Maong labihang kurata sa mga molupyo nga sila nay naigo sa kamandoan sa demolisyon niadtong 2010.
***
Nidangop ang mga molupyo ni Militar. Kinsa maoy nitambag nila sa pagpalaban ni Mayor Rama aron kapugngan ang demolisyon. Matud ni Militar ang kanta-kanta ni Rama lahi kaayo sa mas agresibo nga mga lakang ni Kongresista Tomas Osmeña sa nahaunang susamang mga kontrobersiya dihang siya pay nagduma sa City Hall.
Niangkon si Militar nga di hinuon kutob ra sa kanta-kanta si Rama. Nangayo sab siya og unom ka buwan nga lugway sa korte aron makapangita ang City Hall og relocation site. Matud ni Militar sukad sa sinugdanan nitahan nang daan si Rama sa pagpanalipod sa pagpabilin sa mga molupyo sa luna.
***
Kusganong gipanghimakak ni Rama ang pasangil ni Militar. Gihulagway niya ang mga pamahayag ni Militar atol sa “Arangkada” sa DYAB Abante Pa, Bisaya! nga “hinanggaw.” Matud ni Rama di angayng ipahid ni Militar sa ubang mga tawo ang iyang kapakyas pagpanalipod sa iyang mga kliyente.
Nipasabot si Rama nga kon wa pang lang unta mamolitika si Militar, iya untang gipahibawo ang mga abogado sa City Hall sa mga nahitabo sa kaso. Apan si Militar niingon nga wa magtagad ang mga abogado sa dakbayan pagkuha sa nagbuntaog nga records sa kaso. Gani hangtod karon, segun ni Militar, wa magtagad silang Rama, Konsehal Edgardo Labella ug ubang mga abogado sa City Hall sa pagpahibawo sa korte nga manginlabot na sila sa kaso.
***
Email: leo_lastimosa@abs-cbn.com.