Nalisang sa mga piniriso

Mao diay nga daghang traffic lights dinhi sa dakbayan nga makita nato nga igo lang magkidlap-kidlap ang “caution lights” kay guba diay ug wala kuno atimana sa service provider nga mao ang Innove Communications.

Gihimong sanglitanan ni City Traffic Operations Management (CITOM) Executive Director Rafael Christopher Yap ang usa ka gubaon nga traffic light dapit sa Imus Avenue nga naabtan og siyam ka buwan nga wala gayud maatiman.

Ang Innove Communications, karon mao na ang Globelines, maoy service provider sa mga traffic lights sa 38 ka intersections dinhi sa dakbayan. Girekomendar ni Yap kang Mayor Michael Rama nga putlon na ang kotrata tali sa Innove ug CITOM.

Naestorya nako si Jerry Yntig, ang director for external affairs sa Globe, og iyang gipasalig nga ipadangat niya sa ilang mga opisyal ang maong problema.

Giingnan ko ni Yntig nga gitagad dayon nila ang problema kabahin sa ilang linya apan unsaon nga pangawaton man usab dayon ang ilang bronse nga alambre mao nga kanunay sila nga makasugat og problema.

Alang nako, kon tinuod nga miabot og siyam ka buwan nga wala ayoha sa Innove ang problema sa traffic lights, angay tingali nga ilisan na lang sa CITOM ang mao nga telecommunications service provider.

Diri hinoon sa akong balay, kon maguba ang akong internet nga ang Globelines maoy service provider, ayohon man dayon nila.

* * *

Gidayeg nako si Cebu City jail warden Johnson Calub kay giprangkahan gayud ko niya nga supak ug dili siya motugot og mga binuang diha sa gidumala nga bilanggoan.

Nagpaabot ko nga mabulgar na ang mga binuang diha sa Cebu City Jail karon nga duna na kami “informer” diha sa bilanggoan. Mabulgar na unya kon ngano nga bisan og giunsa pag-estrikto pagbantay, makasulod man gihapon ang shabu.

Kanunay kami nga magsultihanay og sa akong inpormer diha sa bilanggoan ug moreport siya nako sa mga binuang. Bisan ang palitanan og shabu, anaa diha sa bilanggoan.

Ang problema diha sa bilanggoan malisud kaayo masulbad kon dili magbag-o sa ilang batasan ang mga gwardya kon jail guard. Unsaon, sila ra man usab ang mopalusot og mga gidili nga butang.

Kabahin sa mga “kubol-kubol” nga wala gayud unta itugot diha sa bilanggoan, apan tanang selda anaa kining maong mga kwarto-kwarto diin ang nakabentaha mao ang mga lider sa piniriso.

Naglisod si Calub sa paghimo og diha-diha nga kausaban kay sigurado nga moalsa ang mga piniriso.

Dihang gitukod ang Cebu City jail diha sa Barangay Kalunasan giklaro g’yud unta nga walay “kubol-kubol” kon kwarto-kwarto nga himoon sulod sa selda, unsaon nga ang mga nangagi nga warden sa mao nga bilanggoan wala man makasanta sa gihimo sa mga piniriso nga supak sa lagda.

Alang nako, angay tingali nga ang kadagkoan sa Bureau of Jail Management and Penology (BJMP)-7 maoy mohimo og lakang niini.

* * *

Mora’g sigurado gayud si Kongresista Tomas R. Osmeña nga mapilde si 3rd District Congressman Pablo John Garcia ni kanhi Cebu City Councilor Hilario Davide Jr. Kon ang duha magtigi pagka gobernador sa Sugbo sa eleksyon karong sunod tuig.

Ako man gud nga gipangutana si Tommy kon andam pa siya nga makig-uli sa maayong kabubut-on sa kanhi niya higala nga si Pablo John. Ang tubag ni Tommy nga mahimo sila nga maghigala pagbalik unya na human sa kapildehan ni Pablo John.

Nakasabot ko nga si Tommy naiubos gayud ni Pablo John dihang gikwestyon niini kaniadto ang “ownership” sa South Road Properties (SRP) ug miawhag gani og congressional inquiry.

Gikuhaan nako’g reaksyon si Tommy sa pamahayag ni Pablo John nga kon modaug kuno siya pagka gobernador, puli sa igsoon niya nga si Gwen, ipadayon niya ang pakigsuod sa mga opisyal ug sa katawhan sa dakbayan.

Angay gayud nga maninguha si Pablo John kay dili ikalimod nga si Davide humot kaayo sa mga botante sa probinsya tungod sa iyang kabuotan, hilomon nga pagkatawo ug dili hambugero.

Suheto kaayo ko sa iyang batasan kay konsehal man siya kaniadto sa dakbayan sa Sugbo.