Saludohan nako ang mga polis nga midakop sa mga suspetsado nga tulisan nga sagad mag-motor sa ilang pagtulis sa mga biktima.
Napukaw ang akong pagkatulog kaniadtong miaging gabii kay giteksan ko ni Cebu City police director Melvin Ramon Buenafe nga nadakpan nila ang duha ka tulisan human sa ginukdanay nga miabot sa Mandaue.
Ang usa sa mga dinakpan nakuhaan nila og kalibre 45 nga pistola. Sa wala pa kini madakpi, ila unta nga tulison ang duha ka foreigners didto sa Mabolo apan naalarma dayon ug misangpot sa ginukdanay.
Nindot g’yud nga duna ta’y mga polis nga mag-motor kay dali ra makaresponde. Kagahapon sa buntag duna sa’y girespondehan ang kapolisan nga alarma sa armadong tawo didto sa Sanciangko.
Nadakpan g’yud ang usa ug nakuhaan kini og automatic nga mga armas ug mga bala. Nindot kaayo ang gihimo sa mga polis nga dungan sila nga maghimo og mobile checkpoints sa lainlaing dapit dinhi sa dakbayan.
Ang gitawag nila og “Motorcycle Stop” epektibo kaayo nga masanta kining mga tulisan nga magsakay og motor ingon man madakpan ang mga tawo nga magdala-dala og armas bisan walay pagtugot.
Dasigon pa nako si Kernel Buenafe nga paspasan pa ang pagpahigayon og mobile checkpoints aron maislag kining mga dautang elemento nga nagsamok-samok dinhi sa dakbayan.
* * *
Congrats sa bag-ong hepe sa Carbon police station. Misalig ko ni Chief Inspector Pablo Cabildo nga takus siya nga modumala sa bag-o niya nga puwesto kay pwerteng dugaya niya nga nadestino diha.
Bisan dili pa siya opisyal, diha na madestino si Cabildo. Dayon nahimo siya nga imbestigador sa daghang katuigan ug hangtod nga misaka ang iyang ranggo ngadto na sa pagka opisyal.
Hagiton nato si Cabildo nga pitolon niya ang daghang badlongon diha sa barangay Ermita, ilabi na sa Carbon market. Wala malilong kanato nga anaa diha sa Carbon mag-operate ang daghang mangungu-ot, snatchers ug uban pa nga badlongon.
* * *
Malipay kita kon paspasan pa sa Cebu City Health department ang pagpang-apod-apod ngadto sa mga tunghaan niining mga kurtina nga adunay kemikal nga makapatay sa mga lamok.
Ang labing uwahi nga tunghaan nga gihatagan nila sa maong matang sa kurtina mao ang Bagong Lipunan Elementary School (BLES) nga anaa mahimutang sa barangay Mabolo.
Gitug-anan ko ni Durinda Macasocol, ang assistant chief sa City Epidemiology Statistics and Surveillance Unit, nga nangalipay kaayo ang mga maestra nga gihatagan sila sa maong matang sa kurtina.
Nanagana lang sila si Macasocol kay duol man og sapa ang maong tunghaan. Kana gud nga Lahing-lahing Creek hinay ang agus sa tubig ug posible nga may lim-aw nga makaitlog ang mga lamok.
Timan-i ninyo nga aduna nay usa ka bata nga namatay dinhi sa dakbayan human paaka og lamok nga may dengue virus pagsulod g’yud sa buwan sa Pebrero.
* * *
Ang pagpasakay sa mga sakop sa pamilya sa sakyanan nga iya sa kagamhanan wala g’yud itugot sa lagda sa Commission on Audit (COA). Apan kon paingon sa opisina maagian ang eskwelahan sa bata o kaha ang gitrabahoan sa asawa, mahimo tingali nga makonsiderar.
Apan timan-i nga wala g’yud kini itugot sa balaud. Kon imong hinuktokan, maayo man usab kay mosayo man ang maong empleyado sa pag-adto sa iyang opisina.
Ang dili maayo mao nga kon ang gitunghaan sa bata dili agianan sa pagpaingon sa opisina unya tuyoon ra g’yud kini sa pag-adto. May usa ka opisyal sa Cebu City Hall nga maigo niini ug ako kining gituyo aron siya magmatngon.
Kon ang bata igo lang ihatod sa tunghaan unya mobalik ang maong opisyal sa iyang balay sa dili pa moadto sa opisina, kana maoy dakung salawayon na. Dili lang usa nako ilhon ang maong opisyal sa City Hall.
Ako na hinoon siya nga napahimangnoan kay miatubang man siya sa Selection Committee, diin ako usa sa mga sakop, kay gituboy man siya nga hatagan og award sa Charter Day.
Samtang gidayeg nako ang maong opisyal kay maisip man nga buotan siya nga pagka amahan, apan gikuyawan ko nga basin masubrahan ug makahimo na siya og kalapasan sa balaod.