Sayon kaayo alang sa mga tigpasiugda sa nagkalainlaing kalihokan sa Piyesta Senyor ug Sinulog ang pag-awhag sa mga Sugbuanon ug lokal ug langyawng mga turista nga magpailob sa kahuot sa trapiko kay gigamit sa higanteng kasaulogan ang labing dagkong kadalanan sa Dakbayan sa Sugbo.
Wa mabatyagi ang kahasol sa trapiko atol sa paglusad sa nobenaryo niadtong Huwebes kay ang “Walk with Jesus” gikan sa Fuente Osmeña paingon sa Basilica del Sto. Niño gihimo man sa kadlawon. Ni sa pagpahigayon sa napu ka novena masses matag adlaw sud sa Pilgrim Center.
Apan natanggong ang mga motorista nga naatlan sa paglusad sa Sinulog 2012 niadtong Biyernes ug sa mga Sinulog sa Kabataan sa weekend.
* * *
Sayon kaayo alang sa mga tigpasiugda ang pagtambag sa mga motorista ug mga pasahero sa pagpaminaw ug pagbasa sa media sa pagkausab sa mga ruta hangtod na sa Solemn Procession karong Sabado ug sa Sinulog Grand Parade karong Dominggo. Sayon kaayo ang pagtambag sa mga motorista ug mga pasahero nga i-atol ang ilang mga lakang sa mga takna nga hawan pa ang kadalanan ug likayan ang maapektahan nga mga ruta kon magpadayon nang kalihokan.
Apan unsa may mahimo sa mga nagpuyo o nagtrabaho sa mga dapit nga himoan sa kalihokan? O sa mga kinahanglang moagi sa tak-opan nga mga dan tungod sa mas dinalian ug mas mahinungdanong katuyoan?
* * *
Pipila sa mga motorista nga natanggong sud sa tulo ka oras niadtong Biyernes nibanhaw sa sugyot nga himuon ang paglusad sa Sinulog atol sa weekend, di sa adlaw nga may trabaho ang tanang kompaniya. Niawhag sab sila nga pamub-an ang ruta gikan sa Basilica kutob sa Cebu City Sports Center, inay nga ilahos gyud sa Fuente.
Nangiliyupo sab sila sa mga tigpasiugda nga hunungon na ang naandan nga pagpatuyang sa sipa nga sound systems sa Fuente ug kasilinganang kadalanan. Bisan tungod ug alang na lang sa mga motorista ug mga pasahero nga may sakit sa kasingkasing ug sa mga pasyente sa mga tambalanan sa duol nga grabe ang kahimtang.
* * *
Ang higanteng kahasol, kon di man hingpit nga pagka-inutil sa trapiko, maoy usa sa mga sukaranan sa mga awhag nga sayuhon ang pagbalhin sa Sinulog Grand Parade ngadto sa South Road Properties (SRP). Nga di hinuon maapura kon magpadayon ang morang umang nga pagtukod og mga istruktura sa hangtod karon hawan pa nga luna.
Minilyon ang kinasingkasing nga nisalmot sa relihiyusong kalihokan sa Piyesta Senyor ug ang niduyog sa kasadya sa Sinulog. Apan mas daghan ang wa untay laraw pagpanginlabot sa kalihokan nga naangin kay, sa gusto nila o sa dili, gitak-opan ang hapit tanang agianan.
Angayng pahinumdoman ang mga tigpasiugda nga ang pagpanligis di usa sa mga taras sa Balaanong Bata.
* * *
Email: leo_lastimosa@abs-cbn.com