Pagtulon-an sa uban

Kon mahitabo nga mobundak ang kusog kaayo nga uwan ug molungtad og taud-taud nga higayon sigurado nga ang nahitabo sa maong mga dapit, matagamtaman usab sa mga lumolupyo dinhi sa ato nga anaa manimuyo daplin sa sapa.

Gikuyawan ko nga nagtan-aw sa ubang balay nga anaa gitukod sa tampi gayud sa mga dagkong sapa unya wala pa g’yuy maayo nga riprapping. Gidung-aw nako ang ubos nga tampi sa sapa samtang diha ko sa taytayan sa Sudlon, Lahug, gikuyawan ko.

Daghang mga balay nga anaa gitukod sa tampi sa sapa nga sigurado nga mabanlas sa baha kon matumpag ang yuta sa daplin sa sapa. Ang balaud nagdili sa pagpapuyo sa tres metros ang gilay-on gikan sa tampi sa kasapaan.

Apan wala gayud kini mapatuman kay unsaon nga walay kwarta ang dakbayan aron nga ang maong mga pamilya balhinon sa lugar nga dili na kuyaw alang kanila.

Gihunahuna nako og maayo ang hitabo sa Negros Oriental ug sa Iligan City. Sayonan ka nga sa Iligan City kapin na sa 200 ang patay ug lain pa nga kapin sa 200 ang gipangita pa.

Sa Negros kapin sa 40 ka tawo usab ang namatay ug duna pa’y missing. Makaingon ko nga kompyansa ra g’yud kaayo ang maong mga tawo mao nga wala sila makabantay nga miabot na si “Kamatayon” nga mikuha kanila.

Kahilakon ko nga naminaw sa saysay sa usa ka taga Iligan City nga giinterview sa DYLA kagahapon sa buntag. Nahuna-huna man gud nako ang kaguol sa mga pamilya nga nawad-an og mga minahal sa kinabuhi.

Apan hinoon, kining tanan kagustohan sa “Kahitas-an” og angay nato nga dawaton bisan og sakit palandungon.

* * *

Sama gud nako, subo kaayo ko gikan pa sa unang adlaw ning buwana. Napagaw ko mao nga naibog lang kaayo ko sa mga higala nako nga lingaw kaayo pagkanta sa mga videoke.

Gisuwayan na nako ang daghang paagi nga mahanaw ang akong pagaw, apan tulo na ka semana nga wala g’yoy kalamboan. Apan tingali kabubot-on ni sa Ginoo kay siya man ang magbuot.

* * *

Akong balikon nga hangtod karon wala gayud matuman ni Noel Artes ang iyang pasalig nga kuhaon kining tindahan nga anaa gibutang sa aseras diha sa eskena Bonifacio ug Sikatuna.

Ambot, ingon g’yud tingali niini ang patakaran ni Noel Artes nga bisan og sayon ra kaayo nga trabahoon molungtad og pipila ka semana. Dili ba kanang gitawag og “aksyon agad.”

Unsaon, dili man ako ang mayor. Kon ako pa ang mayor dugay ra nga namutos kini si Noel Artes. Amigo mi niini si Noel sukad pa nga hepe pa siya niadto sa Division for the Welfare of Urban Poor.

Dili na lang ko mosulti kon nganong gihulipan siya niadto sa DWUP. Palihog lang Mr. Artes, ayaw ibutang sa peligro ang kinabuhi sa mga tawo nga anha na maglakaw sa karsada tungod sa negosyo sa usa ka tawo.

Ang tag-iya niining maong kan-anan nagpadala nako og suwat. Mihangyo siya nga sabton ang iyang kahimtang kay wala siya’y laing panginabuhian. Walay nagpugong niya pagnegosyo apan ayaw isakripisyo ang mga tawo.

Nakakita man gud ko nga dunay tawo nga diriyot g’yud tawon mabag-iri sa usa ka sakyanan nga gikan sa Bonifacio Street midisilya pagliko sa Sikatuna Street paingon sa Parian.

Kon naligsan pa kadtong maong tawo moabaga kaha sa bayranan ang usa ka Mr. Sintos nga naghangyo nga siya papadayonon ra pagpaninda sa maong dapit? Kini maoy huna-hunaa pag-ayo Mr. Artes.

Mora’g kadudahan na kaayo ang pag-ukon-ukon sa mga sakop sa SPEED nga aksyonan ang reklamo ngadto sa maong kan-anan. Nahinumdom mo niadtong akong “expose” nga ang uban nila mokaon ra sa mga tindahan nga libre?