Sige lang, fight gihapon

Bisan og dili kaayo dako ang annual budget nga aprobahan sa konseho sa dakbayan sa Sugbo atol sa ilang sesyon ugma, apan dili kini rason nga mohinay ang mga tax collectors sa pagkobra sa tukmang bayranan sa buhis.

 Akong gitimbang-timbang pag-ayo ug nakab-ot sa akong hunahuna nga usa sa mabasol ngano nga gamay ra ang kantidad sa buhis nga nakolekta mao ang mga kawani sa City Hall nga gitahasan pagkolekta sa buhis.

 Ang mga kawani sa City Treasurer’s Office gihatagan og mga P50 milyones aron gastohon sa pagpahigayon og tax mapping para unta karong tuiga, apan wala nila mahimo ang tahas kanila.

 Giangkon ni City Treasurer Tessie Camarillo nga ang gihimo sa iyang mga sakop mao nga naghuwat ra sila niadtong mga buotang magpapatigayon nga boluntaryo nga mibayad og buhis nga miadto sa City Hall.

 Unya karon moingon na sila nga paspasan kuno nila pagpahigayon ang tax mapping aron masayran kon kinsa sa mga magpapatigayon ang walay magbayad og buhis.

 Nganong wala man ninyo kini himoa karong tuiga nga gibutangan man kamo og budget basi sa inyong gipangayo?

 Ang ilang giplano nga mohimo’g revalidation sa mga real property units (RPU) sama sa mga parsela sa yuta, building ug makinarya, kon ang gibayad nga buhis tukma ba sa iyang classifications, nindot kaayo. Apan nganong karon pa man?

 Unsa man kaha’y tukma nga pulong aron paghulagway kanila, mga kugihan o ligoy? Unya ra ba kon dunay announcement nga pahatagan ang mga national government employees og dugang tag P10,000 nga bonus, mangindahay dayon nga iapil sila.

 Kon duna may hatagan kadto ra nga mga kugihan ug ibasi kini sa performance evaluation report sa tagsa-tagsa nila ka mga department heads. Gani duna pa’y makalusot ani kay ang mga suod sa mga hepe sa opisina bisan pa’g ligoy, di man g’yud na mabiya.

Sa akong pagtan-aw, lisud kaayo kab-uton ang P11.8 bilyones nga gipangandoy’ng budget ni mayor Michael Rama kon ang mga kawani sa City Hall magtinapolan.