Liwas sa Halad

Kasadya Gym, CTU Main Campus—Nagsugod na mi og panghipos sa kahimanan sa labing dako sa tanang Grand Halad sa Kapamilya nga napahigayon sa niaging unom ka tuig.Sa kataposan namong ihap, niabot og 13,600 ang nakasud dinhi ug nakapahimus sa gatosan ka libreng mga pangalagad. Wa pay labot ang kaliboan sab nga nisalmot sa Kapamilya Mega Local Job Fair sa Abellana National School ug sa Kapamilya Local ug Overseas Job Fair sa Panphil Frasco Memorial Gym sa Poblacion, Liloan, Cebu.

Inay kakapoy, kagaan ang gibati sa tanang nakasalmot sa kalihokan.Ang mga namiyesta nangita pa og matilok nga mga pangalagad.Samtang ang mga tigpasiugda nadasig pag-ayo sa katam-is sa pahiyom sa ilang mga natabangan.

***

Ang labing daghan nagpunsisok dinhi sa Kasadya Gym, diin gipahigayon ang libreng konsultasyon sa mga doktor ug pagpanghatag og libreng tambal ngadto sa mga pasyente.Sa akong pagsuwat ini, nahutdan na mi og tambal.Kay di man pabalibad ang naglinya nga mga pasyente, amo na silang gipanghatagan og multi-vitamins ug pinutos nga bugas, sardinas, noodles ug mga sinina.

Wa gyong kalahutay sa kadaghan sa mga pasyente ang P100,000 nga balor sa tambal nga pinalit sa Bantay Bata 163 ug sa hinabang nga tambal gikan sa Department of Health, sa Manna Ministry ni Fr. Soc Saldua ug sa Cebu Eumed Pharmacy nga gipanag-iya ni Yul Jumamao.

***

Bag-ong mga pangalagad nga karon pa mapahigayon sa Grand Halad sa Kapamilya mao ang Philippine Mental Health Association Cebu Chapter nga nihatag og tambag ug tambal sa mga may suliran sa panghunahuna ug ang Gualandi Volunteer Service Program nihalad og mga pangalagad ug kalingawan alang sa mga may kakulian sa pandungog.

Ang Filipino-Cebuano Business Club nga gipangulohan ni Rey Calooy nitanyag sab og ilang kaugalingong mini Halad.Dunay ilang kaugalingong legal ug medical services ug business ug financial clinics, diin tagsa-tagsa nilang gipakigsultihan ang mga gustong mobubo og puhonan ug ang mga gustong magnegosyo nga way puhonan.

***

Sa kadaghan sa mga nagtinabangay paghalad sa gatosan ka mga pangalagad nga balor og minilyon ka pesos, way bisan usa nga makapangangkon nga mas dako ang iyang natampo kay sa uban.Managsama ang tanan nga nakatabang, dako man o gamay ang ilang halad.Sama nga way maningil unya sa Lunes aron magpauli sa ilang kahago ug kahimanan nga nahatag.

 Ang sunod nga Grand Halad sa Kapamilya unya pa sa Hunyo 2012, atol sa ika-17 nga anibersaryo sa DYAB Abante Pa, Bisaya!Apan sa di pa moabot nang petsaha, bukas mi sa kahigayonan nga makigtambayayong sa pribadong kahugpongan o mga kompaniya o mga buhatan sa lokal ug nasudnong gobyerno nga gusto sang mopasiugda sa ilang kaugalingon nga Halad sa Kapamilya.

***

Email: [email protected]