Tan-aw nako, ang problema sa trapiko dinhi sa dakbayan mosamot kon tugotan ang pipila ka sakyanan nga nagbiyahe sa mga lagyo nga rota sa pagpamasahero na dinhi sa mga karsada nga wala nila pasudli karon.
Samtang malooy kita nga dunay masakripisyo, apan angay usab nga tan-awon sa dagway unya sa mga karsada kon pasudlon na pagbalik ang mga PUJ nga nagbiyahe sa lagyo nga mga rota.
Kinahanglang sutaon kon pila ka sakyanan ang nagbiyahe sa mga rota nga gawas sa dakbayan aron mabanabana nga kon pasudlon kini sila, unsa kaha’y sitwasyon sa atong mga karsada.
Buyno, maayo man usab ang sugyot nga “odd-even scheme” pasudlon karon ang usa ka sakyanan nga “odd” ang katapusan sa iyang plate numbers, unya inigkaugma, kadto na usab nga “even” ang katapusang numero sa plaka ang pasudlon.
* * *
Kadtong dunay mga sakyanan nga moadto sa menteryo karong adlawa ug ugma labing maayo nga magkuha g’yud kamo og drayber kay lisud ang pagpangita og kaparkingan, kuyaw kaayo kon inigbalik ninyo wala na ang inyong sakyanan.
Mahimong matugotan kamo nga mohunong duol sa menteryo aron pagpakanaug sa nagsakay apan dili maka-park. Gawas sa mga traffic enforcers, ang Land Transportation Office (LTO) modestino sa iyang mga law enforcers nga modakop niadtong dili mopatoo.
Timan-i nga dunay mga traffic signs nga ibutang diha duol sa mga menteryo nga gidili ang pag-park sa mga sakyanan. Kadtong dili motuman aw gusto g’yud nga makamulta og P1,278 sa pag-disregard sa traffic signs.
* * *
Kadto diay’ng mga tawo nga may sakit nga hubak, ayaw g’yud kamo pagdugay sa menteryo kay ang asu sa kandila pwerte nga makapasamot sa inyong sakit. Tingali og gikan sa menteryo diretso na kamo nga moadto sa ospital.
Unya ayaw kalimot nga dili tugotan nga makasulod sa menteryo ang hait nga hinagiban, kutsilyo, sundang ug uban pa, aw labaw na ang armas nga mobuto, gawas lang kon ang nagdala mga sakop sa peace keeping forces.
Ang mga ilimnong makahubog gidili usab sa mga public cemeteries, aw bisan na gani sa mga pribado nga menteryo wala kini itugot. Wala na usab itugot nga magdala og mga musical instruments kay makamugna ra kini og kasaba.
* * *
Didto sa lungsod sa Daanbantayan, daghang mga menteryo nga posible nga walay suga karong gabii ug ugma. Dunay awhag si Mayor Ma. Luisa Loot ngadto sa Cebu Electric Cooperative nga dili konektahan og suga ang mga menteryo nga maisip nga illegal.
Nagpakisusi ko niini ug akong nahibaw-an nga daghang mga menteryo sa Daanbantayan walay permit gikan sa kagamhanan. Basi gud sa Sanitary Code of the Philippines ang menteryo kinahanglang mahimutang labing minus 25 gikan sa kinadul-an nga balay.
Unya, ang mga menteryo kinahanglang 50 metros ang gilay-on sa mga tinubdan sa tubig. Sa ato pa, dili ka basta-basta nga maghimo’g menteryo nga walay pagtugot sa kagamhanan. Nahibaw-an nako nga diha sa Daanbantayan, bisan ang mga adunahang pamilya dunay gitukod nga kaugalingon nila nga menteryo.
* * *
Nalipay ko kay gipatrabaho na gayud ni Mayor Michael Rama ang pagpatiwas sa karsada nga magdugtong sa barangay Guadalupe ug Kalunasan.
Pagka karon gud, motorsiklo pa lang ang makaagi diha ilabi na nga wala pa kaayo’y nasuheto. Kon mahuman na ang trabaho sa Goldfin Construction, ang maong karsada magamit na nga access road aron dili na maghuot ang trapiko atubangan sa Kapitolyo.
Mao kini nga karsadaha nga giadto namo ni Kongresista Tomas Osmeña diin gisaway niya ang administrasyon ni Rama tungod sa kadugay nga mipatrabaho aron mahuman ang karsada nga magdugtong sa duha ka barangay.
Kon mahuman na ang maong karsada, kadtong mga sakyanan nga gikan sa Guadalupe nga gustong moadto sa Lahug, ug kadtong gikan sa Lahug nga mopaingon sa Guadalupe, dili na kinahanglang moagi pa atubangan sa Kapitolyo.
Nagpasabot nga moubos ang oras sa pagbiyahe nila subay sa maong karsada. Gisuwayan lagi nako nga nagsakay ko’g motor, singko minutos gikan sa Guadalupe miabot na ko sa Lahug.