Naapud-apod nang tulo ka container vans nga puno sa mga hinabang nga pagkaon ug sinina gikan sa Sugbo ngadto sa mga biktima sa baha sa Luzon. Kapin sa P3 milyones nga balor sa relief goods ang nahipos sa Kapamilya Relief Campaign gikan sa manggihatagong mga Sugbuanon alang sa minilyon ka molupyo sa tungatungang Luzon nga naigo sa lapad ug lawom nga baha gikan sa nagsunod nga mga bagyong Pedring ug Quiel.
Ang mga hinabang makugihon nga gi-repack sa mga boluntaryo nga naglakip sa suking mga tigpaminaw sa DYAB Abante Pa, Bisaya, mga tinun-an, mga kawani sa pribadong mga kompaniya ug mga sakop sa nagkalainlaing kahugpongan. Paspas nga nada ngadto sa mga biktima pinaagi sa door-to-door delivery nga gitanyag sa Gothong Southern Shipping Lines.
***
Apan padayong nagbaha ang mga hinabang sa ABS-CBN Regional Broadcast Complex sa Jagobiao, Mandaue City bisan dugay ra namong gitak-opan ang relief campaign. Ug kinsa man ming mobalibad sa kinasingkasing nga tampo alang sa mga biktima sa pait nga mga katalagman?
Mao nga nananghid mi sa mga nanghatag sa hinabang ug sa ABS-CBN Foundation nga mahimo ba nga ang nahibiling mga hinabang di na lang dad-on sa kaulohan kon dili ari na lang i-apud-apod sa mga biktima sab sa baha sa atong kaugalingong nataran. Ubos sa ilang pagtugot, napilian namo nga hatagan sa hinabang ang mga biktima sa labing uwahing pagbaha sa suba sa Mahiga.
***
Gibanabana nga kapin sa 600 ka pamilya ang naigo sa baha sa duha ka tampi sa Mahiga, nga maoy utlanan sa mga dakbayan sa Sugbo ug Mandaue. Labing daghan nga naigo mao ang mga molupyo sa nagkalainlaing sitio sa Barangay Subangdaku. Gibahaan sab ang kabalayan sa Panagdait ug ubang mga sitio sa Kasambagan, sa habig sa Dakbayan sa Sugbo.
Gatosan ka boluntaryo ang nitabang na sab sa laing hugna sa repacking sa ABS-CBN Complex. Timing nga niabot ang ikaupat nga container van sa Gothong Southern Shipping, dali kaayong napuno sa mga hinabang ug nahatod ug naapud-apod dayon ngadto sa mga biktima sa Subangdaku.
***
Si Barangay Kapitan Jun Lim sa Kasambagan wa pang kahatag namo sa tukmang gidaghanon sa mga pamilya nga naigo sa baha. Gitakda nga maapud-apod ang ilang mga hinabang karong semanaha. Nauna ang Subangdaku kay si Barangay Kapitan Ernie Manatad nakahatag dayon sa gidaghanon sa mga pamilya nga nabahaan ug nakapahuwam pa og sakyanan paghakot sa nahibiling relief goods.
Sa makausa pa, gikan sa kinauyokan nga bahin sa among kasingkasing, magpasalamat mi sa mga Sugbuanon nga wa magmakuli sa pagpakigsawo sa ilang grasya ug panahon aron paghimong malampuson sa Kapamilya Relief Campaign. Ang inyong tabang nakapagaan sa pait nga kalbaryo nga padayong gipas-an karon sa mga biktima sa baha.
***
Email: leo_lastimosa@abs-cbn.com