Win-win solution sa flyover

 Kon imong timbang-timbangon pag-ayo, husto man usab ang baruganan ni Mayor Michael Rama nga palapdan usa ang karsada bisan diha lang sa dapit nga tukoran sa flyover sa dili pa tukoron ang vehicle overpass.

 Matag adlaw anaa ko mag-agian sa Gorordo Avenue ug bisan ako nagtoo nga kon unahon ang pagtukod og flyover diha sa maong lugar, lisud na nga maagian og sakyanan ang Gorordo Avenue, karsada nga kaliboan ka sakyanan ang mag-agian matag adlaw.

 Sayod ko nga ang P300 milyones sa kinatibuk-ang P600 milyones nga budget pagtukod og duha ka flyover alang kini sa pagpalapad sa karsada, apil na ang pagbayad sa yuta nga maapektahan sa road widening.

 Kon toohan nato si DPWH district engineer Nicomedes Leonor nga duha ka lanes sa karsada ang tukoron sa matag kilid sa flyover, nagpasabot kini nga kay gipasalig man nila nga dili matandog ang Asilo dela Medalla Milagrosa, aro sila moiban sa atbang.

 Kay suheto lagi ko sa maong dapit, kon tinud-on man g’yud ang pagmugna og duha ka road lanes sa matag kilid sa flyover, kanang mga balay dapit sa eskena nga paingon sa usa ka hotel duol sa gasoline station, mapapas na.

 Unya sa pikas eskena kanang karsada nga entrada paingon sa Perpetual Soccour Hospital mapahak usab o kaha ang atbang nga sidewalk makan-an sa road widening.

 Tan-aw nako kini maoy “win-win” solution sa problema. Inigkahuman sa road widening, isunod dayon ang pagtukod sa flyover project. Husto baya usab ang baruganan sa uban kay possible baya nga kutob ra sa sulti ang DPWH nga palapdan nila ang side roads apan dugay-dugayon lang.

 Sumala tan-awa ninyo ang side roads sa barangay Luz kilid sa flyover. Hangtod karon nagpabilin nga maglisod gani ang mga dagkong sakyanan nga moagi niini.

 Tinuod nga dako kaayo ang kantidad nga gikinahanglan kon ang road widening ipatuman sa taas kaayo nga karsada. Sayod usab ko nga ang pagtukod sa flyover dili hingpit nga makasulbad sa traffic congestions.

 Pananglit ang mga sakyanan nga gikan sa Archbishop Reyes Avenue dili na malangan pag-left turn nila paingon sa Gorordo Avenue, apan mahunong gihapon sila kay sa unahan duna may eskena nga mao ang Cardinal Rosales Avenue.

 Ang uban usab nga sakyanan tua usab nabara sa eskena Gorordo ug General Maxilom Avenue. Husto baya ang uban nga miawhag g’yud og road widening kay kini maoy hingpit nga sulbad sa kahoot sa mga sakyanan.

 Kini man gani maoy rason nga si Kongresista Tomas R. Osmeña dihang siya pa ang chairman sa Regional Development Council (RDC) kaniadto naninguha nga mapalapdan ang V. Rama Avenue, ang B. Rodriguez, ang ubang karsada sa North Reclamation Area, Canduman Road sa Mandaue ug daghan pa.

 Apan dili usab ko gusto nga dili na lang tukoron ang flyover project sa rason nga makapalaksot kini sa talan-awon. Sa ubang nasud duna man gihapo’y flyover. Sa Taiwan lang gani lig-on ug hamis pa kaayo ang ilang flyover.

 Busa, alang kanako aron makakab-ot kita og “win-win solution” sa nagkabangi nga pundok, ipadayon nato ang pagtukod sa flyover apan unahon nato ang pagpalapad sa karsada bisan diha lang palibot sa dapit nga tukoron ang vehicle overpass.

***

 Ang mga deputized agents sa Land Transportation Office (LTO), ilabi na ang mga sakop sa Task Force Alpha (TFA), miserbisyo nga walay sweldo, walay allowance ug migasto pa sa kaugalingon nilang kwarta aron pagtabang nga madisiplina ang mga badlongong drayber.

 Alang kanako angay pa man gani nga daygon ang mga deputized agents apan dunay usa ka sakop sa LTO operations branch nga si Francisco Nailon mibaliwala ra niini og mibugal-bugal pa sa duha ka deputized agent.

 Batan-on kini si Francisco ug ambot ig-unsa niya ang acting chief sa LTO didto sa Medellin. Abi kaha ni Francisco og maayo ang iyang gihimo mao nga karon nag-atubang siya og problema.

Panggunit g’yud Do aron dili ka mataktak. Nag-angkas man gud ni siya og motor nga wala mag-helmet mao nga gisita sa duha ka LTO deputized agent ang drayber. Miingon man nga “Ah deputized ra man diay mo.”