Goodbye Dr. Sedoripa

Gianog’nan kaayo ko ni Dr. Eduardo Sedoripa nga mobiya na pagdumala sa Cebu City Medical Center (CCMC) kay natan-aw man gud nako nga maayo siya nga modumala sa maong tambalanan.

 Ikaduha, dili mahadlok si Dr. Sedoripa nga moatobang sa mga news reporters ug manubag sa mga pangutana. Bisan og pito pa lang siya ka buwan nga nagdumala sa CCMC apan nasabtan nako nga sinati niya ang iyang trabaho.

 Ingon niana ang usa ka matuod nga department head, apan baya kining uban nga masabot man nga kuwang kaayo og kasinatian sa ilang trabaho. Isip reporter sa The FREEMANsa City Hall, gibantayan nako kinsa ang nagtinarong sa ilang trabaho.

 Dihang miadto si Dr. Sedoripa kagahapon sa City Hall aron sa pagpanamilit kay kutob ra man Hulyo 31, 2011 ang iyang serbisyo, nasubo ko kay nawad-an na usab og maayong opisyal ang CCMC.

 Sigurado man ko nga dili na mobalik si Dr. Sedoripa sa iyang katungdanan pagka direktor sa CCMC. Moadto siya sa Canada ug hayan adto na motrabaho. Mao na ang giingon ni Mayor Mike Rama nga daghan ang maayo nga doktor apan dili modawat isip direktor sa CCMC kay gamay man og sweldo.

 Maayo unta og makakita og laing “Dr. Sedoripa” si mayor Rama nga tugyanan niya pagdumala sa CCMC unya maayo nga modumala sa ospital aron nga tinuoray kini nga moserbisyo sa katawhan.

 Gidayeg nako si Dr. Sedoripa. Giduso na niya sa City Hall ang iyang rekomendasyon kon pila ang angay’ng igahin nga budget sa ospital alang sa sunod tuig. Iyang gisugyot kang mayor Mike nga tunga sa bilyon ka pesos ang budget nga igahin sa CCMC.

 Sa maong budget, gisugyot ni Dr. Sedoripa nga ang P20 milyones nga gahin alang sa pagpamalit og drugs and medicines karong tuiga, himoon na nga P137 milyones sa sunod tuig. Unya mokuha ang CCMC og dugang mga doktor ug nurses.

 Maayo kaayo og panglantaw si Dr. Sedoripa ug angay siya nga daygon kay abi ninyo, matud sa uban “health is wealth” mao nga angay’ng atimanon gayud nato ang atong panglawas.

 Unsaon pagka epektibo sa CCMC kon ang budget nga igahin pagpamalit og tambal moabot ra og P20 milyones? Mao kana nga kon maadmit ang imong sakop sa pamilya tunolan ka lang sa mga doktor og resita aron ikaw ang mopalit sa tambal.

 Kon matuman ang gisugyot nga budget ni Dr. Sedoripa mahimong ang tanang gikinahanglan nga tambal sa usa ka pasyente anaa na sa pharmacy. Unya, bisan og government hospital ang CCMC apan pabayron gihapon ang mga pasyente – barato lang dili sama sa private hospital.

Gisugyot usab ni Dr. Sedoripa nga ang dakbayan mamalit og mga aparatus aron nga ang tanang laboratory anha na himoa sa CCMC. Kon department head ka gud, kinahanglang duna kay bug-at nga tingog nga mopasabot sa mga hingtungdang opisyal.

 Dili sama anang uban diha nga kon paatubangon sa mga konsehal sa sesyon magkanga-kanga pagsulti nga klaro kaayong walay kasinatian sa iyang trabaho. Unya kon pakighinabian sa mga reporters tak-om kaayo ang ba-ba. Paet!

* * *

 Supak man diay si Mayor Mike Rama nga pausbawan ang kantidad sa multa alang sa mga madakpan nga magpataka lang og labang sa karsada. Wala usab hinoon siya moingon nga dili niya pirmahan ang ordinansa kon mapasar kini sa konseho.

 Gikuhaan nako og reaksyon ang mayor kabahin sa sugyot ni Konsehal Ritchie Osmeña nga ang multahan sa mga madakpan sa jaywalking himoon na nga P1,000 gikan sa P500, unya ang compromise penalty gikan sa P50 himoon na nga P200.

 Abi ninyo, supak gani si Rama nga dunay compromise penalty kay natan-aw niya nga usa kini sa makapadasig sa madakpan nga mosuborno sa modakop kanila.

 Apan ang isyu diha mayor mao nga kinahanglan nga ang atong mga sakop sa anti-jaywalking team dili corrupt. Kami bitaw sa LTO Task Force Alpha kon manakop unya dunay drayber nga mosuway’g suborno, kataw-an ra man namo.

 Resulta, nakuha namo ang respito gikan sa mga drayber. Husto baya usab ang giingon ni mayor Rama nga ang makanunayong pagpatuman sa balaod maoy tukma nga buhaton, dili kay ipatuman karong adlawa unya ugma dili na.

 Unsaon, kuwang pa si higalang Citom executive director Raffy Yap sa pagmonitor kinsa sa iyang mga sakop ang magtan-aw ra sa mga malapason sa balaod. Mao kana nga ang mga drayber minus kaayo og respito sa ubang Citom traffic enforcers.