Libudsuroy!

Nindot ang pamaagi ni Cebu City police director Melvin Ramon Buenafe aron sa pagpaminus sa mga krimen dinhi sa dakbayan.

Ang mga libudsuroy nga kabataan nga sagad makahimo og krimen sama sa pagpanguot ug pagpangawat iyang imbitahon diha sa lainlaing police stations unya pakan-on.

Gibunyagan ni Buenafe og “PAPA-LAB” kining maong proyekto nga nagkahulogan nga “Panggaon, Amomahan Para dili mahimong Labad ug Badlongon” ang maong kabataan.

Human makakaon ang kabataan, lingawon sila pinaagi sa pagpatan-aw og salida, dayon pasabton sila ni Buenafe nga dili gayud maayo ang paghimo og mga krimen.

Gituyo ni Buenafe nga ang kabataang libudsuroy anaa sa kapolisan panahon sa gabii kay aron dili sila makahimo’g krimen, ilabi na batok sa mga langyaw nga magsuroy-suroy sa dakbayan.

Asa man og kwarta si Buenafe ang iyang gastohon matag adlaw aron makapakaon siya sa mga libudsuroy nga kabataan?

Gipasabot ko ni Buenafe nga dili kini lisud kon ang tanang kapolisan o katawhan dinhi sa dakbayan moabag lang kay ang pagpakaon sa kapin sa 100 ka mga bata nga naglibudsuroy sa lainlaing dapit dili mogasto og P1,000.

Sa ato pa kon ang matag usa sa polis nga ania madestino sa dakbayan moamot og P1 matag adlaw makapakaon na sila sa libudsuroy nga kabataan ug nagpasabot nga mapaminus nila ang krimen nga manghitabo.

Pila ra man gud tinuod ang P1 nga usik-usikan ra man gani kini kon mopadala kita og text message sa atong mga higala.

Usahay kon may mensahe ang imong amigo igo lang tubagon “K.” Sa usa lang ka pagpindot sa keypad sa cellphone, nakagasto ka na og usa ka piso.

Sa pag-amoma sa kapolisan ug pagpabatyag ngadto sa kabataang libudsuroy nga sila gipangga diay sa mga polis, hinay-hinay nga nausab ang batasan. Kaniadto, ang mga libudsuroy nga kabataan kon makakita’g polis managan.

Karon ang mga bata nga libudsuroy moduol pa sa police patrol car ug mangutana kon asa himoa ang “feeding.” Wala na sila mahadlok sa mga polis ug ila nang giisip nga higala ang kapolisan.

Nindot ang paagi ni Buenafe kay sa ingon nga paagi magamit pa sila kay magsilbi na man sila unya nga informers sa kapolisan batok sa mga dautang elemento kay suheto sila sa binuang diha sa aseras.

Nahinangop si Buenafe kay daghan kaayo ang mipadayag nga motabang sa iyang programa pag-amoma sa libudsuroy nga kabataan isip paagi sa pag-agni kanila nga magtinarong na.

Unsaon, ang mga ginikanan niining mga bataa maayo lang mohimo’g bata apan dili magtagad sa ilang responsibilidad.

Alang nako kining mga ginikanan nga walay tagad sa ilang mga anak, pastilan angay g’yud nga pasakaan sila’g kaso.

Angay’ng himoan pa og dugang ngipon ang atong balaod aron silotan kining mga ginikanan nga kusog kaayo magbuhat og anak apan dili moatiman kanila.

Wala gani sila makapaeskwela ug dili usab sila malooy nga inig-abot sa tingkaon walay makaon ang ilang mga anak. Kon dili kaagwanta, molayas na lang ang mga bata.

            * * *

Daghan pa g’yud nga mga negosyante og isda nga wala maleksyon. Padayon sila nga mitumod og mga isda dinhi sa dakbayan sa Sugbo bisan og kini kuha sa illegal nga paagi sama sa dinamita.

Dili kamo makabasol kon ang inyong mga isda sakmiton sa mga tinugyanan sa balaod sama sa gihimo sa mga sakop sa Cebu City Bantay Dagat Task Force kagahapon.

Ilang gisakmit ang lima ka kahon sa mga isda nga gitumod unta dinhi gikan sa Masbate. Sobra sa usa ka tonelada ang gibug-aton sa maong mga isda.

Ang tumong sa ordinansa dinhi sa dakbayan sa Sugbo nga mopasakmit sa mga isda nga kuha sa illegal nga paagi mao ang pag-discourage sa mga mangingisda nga mogamit og dinamita sa ilang pagpanagat.

Suheto kaayo ko niini kay taga lungsod ko sa San Remigio nga kaniadto, aw bisan karon, duna may pagpangisda ginamit ang dinamita.

Daghan na nga mga mangingisda nga naputlan sa bukton ug may nangamatay human mabuthi apan wala gihapon motagam ang uban.

Kon kamo nga mga negosyante og isda dili magmatngon, aw makasinati g’yud kamo og grabeng alkanse kon sakmiton ang inyong mga produkto.

Daygon nako ang project director sa Bantay Dagat nga si Koronel Ranulfo Sebusa sa lain niyang kalampusan sa kampanya aron pag-discourage sa mga mangingisda nga mogamit sa illegal nga paagi.