Manakod unta

Adunay ubang drayber og mga taksi nga mounay pagpanulis sa ilang pasahero, apan duna sa’y ubang buotang drayber nga taliwala sa kalisod karon sa panahon apan mouli gihapon sa butang ug kwarta nga mahabilin sa ilang sakyanan.

Kami si Konsehal Edgardo Labella, chairman sa committee on laws sa Cebu City Council, moyukbo gayud kang Rogelio Jagopaas, 40-anyos nga drayber sa CTC Taxi nga miuli sa pitaka sa iyang pasahero.

Taga sitio Upper Lamacan, barangay Valladolid, Carcar si Jagopaas ug mata’g adlaw mokita siya og P500 ngadto sa P700 sa pagpamasahero. Dako na kaayo ang P16,090 nga kwarta nga nahabilin sa iyang sakyanan.

Kon gitago pa kini niya, makapalit na siya og mga pito ka sakong bugas-humay nga maayo og kalidad. Apan mipasuwabi ang maayong batasan kaniya mao nga gihatod sa drayber ang pitaka ni DYSS broadcaster Bobby Nalzaro.

Wala may kontak number ang ID cards nga didto sa pitaka mao nga didto na lang gitugyan ni Jagopaas ang pitaka sa radioman. Tuod man, nakadungog si Koc Guan Dy sa radyo ug gikuha ang pitaka ug kwarta.

Misakay si Dy sa taksi ni Jagopaas didto sa pantalan ug nagpahatod sa Banilad apan sa dayon na niining kanaug, nabantayan niya nga nawala ang iyang pitaka.

Bisan giunsa paghiling-huling sa Insik, wala g’yud niya makit-i. Matud ni Jagopaas nga pagka alas tres sa hapon adtong Dominggo, human niya og snack, gisuling g’yud niya ang ilawom sa lingkoranan ug didto ra ang pitaka.

Matud ni Konsehal Labella nga ugma, iyang isugyot nga si Jagopaas hatagan og pasidungog sa konseho sa dakbayan isip model driver ug malaumon si Labella nga ang batasan ni Jagopaas manakod unta sa ubang drayber.

* * *

May mireklamo didto sa Office of the Ombudsman-Visayas batok sa kadagkoan sa Land Transportation Office (LTO) kay kuno daghang lisensya sa mga drayber nga madakpan, i-release ra nga walay resibo sa bayad.

Daygon nako ang complainant nga si Antonio Dosado kon mapamatud-an niya ang iyang pasangil. Sa ako na nga gipasalig nga bisan og deputized agent ko sa LTO apan dili ko molaban kon dunay binuang.

Kon gusto ka Mr. Dosado hatagi ko og mga ebidensya sa imong gipamasangil. Dili tukma nga iuli ra ang mga dinakpang lisensya tungod sa paglapas sa balaod sa pagmaneho’g sakyanan nga dili mobayad sa multa.

Unya, mangutana usab ko nimo kon nganong nawagtang ka man sa imong trabaho sa LTO? Karon ba lang nimo kini mabantayi ang maong binuang diha sa LTO? Sa panahon nga diha ka pa, iapil usab og reklamo.

Basin og mireklamo ka lang kay aron kuhaon ka pagbalik sa LTO Sir. Puslan man nga mireklamo ka na, hugta na ang imong bakus.

* * *

Atensyon Cebu City police director Melvin Ramon Buenafe ug Assistant City police director Paul Labra II.

Palihog padestinohi og mga plainclothes policemen kining duol sa among opisina kay kaniadtong Biyernes sa gabii, ingon sa walay kukahadlok ang usa ka tawo nga nangilkil og sensiyo sa mga drayber sa PUJ nga mohunong atol sa stop signal.

Dihang gibadlong sa gwardya ang tawo, milakaw tuod apan dunay duha ka laing tawo nga miabot og gihulga ang among gwardya. Dili kuno kini pahilabton kon may makit-an nga ilang binuhatan.

Maayo na lang nga mga polis ang makapusil nila dili ang among gwardya. Nindot ra ba kaayo’g armas ang among mga gwardya kay pistola g’yud ni apan wala nila tahora.

Palihog mga plainclothes personnel lang ang idestino. Nagtoo ko nga kadtong mga tawhana maoy kanunay mangawat sa mga sakyanan diri sa Freeman. Tulo na ka sakyanan ang nalungkab.

* * *

Ang politikanhong panagsungi nila ni Mayor Michael Rama ug sa mga konsehal sa dakbayan makaayo ba kanatong katawhan? Unsay inyong pagtan-aw?     

Alang nako, mahimo nga makaayo apan kon pasobrahan, makaapekto usab kanatong mga magbubuhis.

Apan nindot nga dunay “check and balance” sa mga pagahimoon sa atong mg opisyal. Kaniadto ng kauban pa sila sa usa ka grupo, tangdo ra man dayon ang mga konsehal.

Karon, bisan si Mayor Rama makareklamo na nga dili magpangikog kon may mabantayan siya nga dili maayong buhat sa mga sakop sa konseho. Sa ato pa makaayo kini kanato.

Apan kon ang maayong tumong babagan na lang usab kay kontra sila, dili na usab kini maayo.