Sigurado ka g'yud Ma'am?

Gibutyag sa warden sa Cebu City Jail nga gipahibalo na siya sa presiding officer sa Police Coordinating and Advisory Council (PCAC) nga hapit na ibalik kanila ang paghatag og rice allowance alang sa mga piniriso ug ang binuwan nga incentive sa matag usa ka gwardya sa bilanggoan.

Gitug-anan mi ni Jail Superintendent Maria Victoria Jimenez nga gisaaran siya ni Retired Major Romeo Cordova nga mora’g dili na madugay ang ilang hangyo nga ibalik ang tag P200,000 nga kantidad sa rice allowance matag buwan ug ang binuwan nga cash incentive sa mga gwardya.

Kon ako ang pagbut-on, dili pa g’yud maayo nga ibalik ang rice allowance ngadto sa Cebu City jail nga giputol kaniadto atul sa termino ni kanhi Mayor Tomas R. Osmeña.

Labaw na nga dili pa maayong hatagan pagbalik og monthly incentive ang mga gwardya sa Cebu City jail. Kini tungod kay wala pa nila hingpit nga nasumpo ang mga binuang diha sa prisohan sa dakbayan.

Sayonan ka, bisan giunsa nila pag-estrikto kunohay ang pag-inspection sa mga tawo nga mosulod diha sa Cebu City jail sa barangay Kalunasan, apan padayon gihapon nga nakasulod ang mga illegal nga drugas sama sa shabu.

Ngano man kini? Atul sa press conference sa City Hall kagahapon, gibutyag sa warden nga ang uban kuno nga pagpayuhot og gidili nga butang og drugas hayan gihimo sa gitawag nila og “bombing.”

Ang gipasabut ni Jimenez mao nga ang usa ka gidili nga butang ipasulod ngadto sa prisohan pinaagi sa pag-itsa niini gikan sa gawas sa koral. Pastilan, alang nako layo ra kini kaayo nga posibilidad.

Una, kon ako ang gwardya sa Cebu City jail walay mga tawo nga makapaduol sa koral tungod kay ang bilanggoan gilibutan man sa unom ka tower nga pulos dunay nagbantay.

Kon tinuod nga may makahimo og “bombing” nga nagpasabut nga molabay sa illegal nga butang gikan sa gawas sa koral aron kini makasulod sa bilanggoan, maayong pangtaktakon sa serbisyo ang nagbantay sa tower.

Mangutana mo og ngano? Kon ibutang nato nga ang ilang ilabay tinuod nga bomba nga mobuto, unsay mahitabo sa mga priso? Ipasabot ba ni Jimenez nga dili luwas ang mga priso sa Cebu City jail kon dunay mohimo og ingon niini?

Ang tinuod, ang rason ngano nga makasulod sa bilanggoan ang mga shabu ug ubang illegal nga butang, apil na ang mga cellphones, kay tanga kaayo ang mga gwardya.

Apan ang report nga akong nahibaw-an gikan sa informer nako diha sa Cebu City jail, ang mga gwardya mismo maoy nagpayuhot sa mga cellphones nga ibaligya nila sa overprice.

Alang nako, dili tukma ang gihimo ni Jimenez nga panalipdan dayon niya ang mga gwardya nga mora’g nasiguro gayud siya nga wala sila makahimo og kasaypanan.

Ang rason ni Jimenez nga iyang giduphan pag-ayo ang mga gwardya kay kuno, dihang siya pa ang administrative chief sa Bureau of Jail Management and Penology (BJMP)-7, siya ang nag-recruit sa maong mga jail guard.

Unsa kaha kon mapamatud-an nga dunay mga gwardya nga nakahimo og binuang diha sa Cebu City jail, andam ba kaha nga si Jimenez morisgo sa mga 30 ka tuig na niyang pagserbisyo sa kagamhanan?

Tambag nako nimo Ma’am kay kaila man nako kini si Jimenez dihang Patrolman First Class (Pfc) pa ang iyang ranggo sa Integrated National Police (INP), dili lang kaayo siya magpalabi pagpanalipod sa mga jail guards.