Adlaw sa panudya

Pasayloa, apan nagduwa ko og “Plants vs. Zombies (PvZ)” dihang gipahibawo ni Ombudsman Merceditas Gutierrez ang iyang resignasyon.Gihuman ug nadaog nako ang napu ka hugna sa “Survival Fog (Hard)” una gibasa ang nagbaha nga text ug chat messages nga pulos nihangop ug nagsaulog sa pagtahan sa gipasanginlang tigdupa ni kanhi presidente Gloria Arroyo ug sa iyang mga alyado.

Ang katagbaw sa akong kadaogan sa PvZ napulihan hinuon dayon og kahimangod dihang natukmaan nako sa ABS-CBN News Channel ang replay sa diskurso ni Gutierrez nga niinsistir lang gihapon nga wa siyay nalapas nga balaod ug nga unya pa sa Mayo 6 magsugod ang iyang resignasyon.

***

Tingali naanad na lang ko sa kadaogan sa matag duwa sa PvZ nga patay gyud tanang zombies.Di ka hatagan og gold trophy hangtod nga mahurot ang tanang kaatbang sa adventure, mini-games, puzzle ug survival modes.Ang kadaogan sa natad sa politika di sama kahingpit.Ni kalunsay.

Di pa seguro ang kadaogan sa kampanya batok sa pangurakot bisan human sa resignasyon ni Gutierrez.Wa pa tay ideya unsay mga binuang nga himuon ni Gutierrez sa nahibiling usa ka semana sa iyang pamunoan.Sa iyang pagdawat sa resignasyon ni Gutierrez, wa pa maghisgot si Presidente Noynoy Aquino og mga ngan ug igo lang magpaabot sa nominees sa Judicial and Bar Council pagkabag-ong Ombudsman.

***

Apan may sukaranan ang lanog nga pagginhawa og luag sa tibuok nasud.Apil na sa mga Sugbuanon.Nga gipul-an na og pinaabot, ug di pipila nila ang naglingaw-lingaw na lang sa PvZ, kanus-a moabot ang adlaw nga matul-id ang di makiangayon nga pagyaka ni Gutierrez sa mga kasong pagpangawkaw nga natanggong sa iyang buhatan sud na sa daghang katuigan.

Hinaot nga ubos sa pagduma sa bag-o ug mas ligdong ug mas kugihan nga Ombudsman makalihok na gyud ang gilawalawaan nang mga kasong pagpangawkaw sa Sugbo, labi na gyud ug di kinahanglan nga kutob ra sa CICC, Baliligate ug mga proyekto sa Asean Summit.

***

Way sukaranan ang pagsaulog ni Gobernador Gwen Garcia sa pagkabasura sa usa lang sa mga kasong kriminal nga gipasaka sa whistleblower nga si Cris Saavedra sa CICC.Ang gibasura sa Ombudsman mao ra ang kaso nga hagbay rang gibakwi ni Saavedra nga naglambigit sa paryente ni Garcia nga nakadaog sa usa sa mga transaksiyon sa CICC.

 May kabalaka nga ni-resign si Gutierrez aron di mahibaw-an sa nasud ang mga ebidensiya sa mga eskandalo nga naglambigit ni Arroyo.Apan ang di malalis nga kamatuoran mao nga inig kanaog ni Gutierrez mawad-an na og gamhanang tigpanalipod silang Arroyo ug mga alyado.Mora silang zombies nga nawad-an sa tanang panagang ug kinahanglan nang managang sa panudya sa mga tanom nga iyang giyatak-yatakan.

Email: [email protected]