Salida sa Kongreso

Human nihungaw ang nangaging mga imbestigasyon sa nangaging mga kontrobersiya—Hello Garci, NBN-ZTE ug Fertilizer scam—may sukaranan ang mga kabalaka nga wa lang gihapoy mahitabo sa nagpadayong imbestigasyon sa Kongreso sa lapad nga anomaliya sa armadong kusog. Mga ebidensiya nga nahipos sa mga senador sa makalilisang nga katigayonan sa mga heneral ug sa ilang mga asawa sayon rang gibaraw sa ilang mga dinapit nga sayon kaayong nakalimot o mas sayon nga nagpasalipod sa ilang “right against self incrimination.”

Maong ang mga imbestigasyon sa duha ka bay balaoranan sa Kongreso nahimo na lang pasundayag giunsa pagbugalbugal ang kaligdong sa atong mga institusyon ug unsa kalisod pagsilot sa mga kawatan.

* * *

Ang mga dinapit sa Kongreso way laing kapilian: Kon di sila motambong, supinahan sila ug mahimong maposasan; ug kon motarung pagtubag sa mga pangutana, mahagbong sa gahong nga mas lawom pa kay sa ilang nahimutangan karon. Kay ang bisan unsang dugang kasayuran nga ilang ihatag sa gikuwestiyon nilang kabtangan, seguro mang ipasa sa Kongreso ngadto sa prosekusyon sa nag-ung-ong na nilang mga kasong kriminal.

Maong gipili nilang ruta nga nakadani unta apan gisalikway ni anhing Heneral Angelo Reyes: Pagpapating uban ang panghinaot nga ang naandang kalangay sa sistema sa hustisya motino nga pila ka buwan gikan karon malingaw nang mga politiko sa mas bag-ong mga kontrobersiya ug gawasnon nang mohimo og dugang maniobra paglingkawas sa mga kaso.

* * *

Ang mga senador ug mga kongresista di sab kasaligan. May pipila nila nga way pupanagana nga nangabogar alang sa labing sad-an nga mga imbestigahunon. Ang di kaayo takos nanghilom. Ug bisan ang pipila sa isog kaayong nangutana nahilambigit sa ilang kaugalingong mas lang-og pa nga mga eskandalo sa una.

Maong makabantay ka nga ang ilang pinangutan-an mas daghang insulto kay sa unod. Klarong gitumong pagpanimawos sa mga nakaapiki nila sa una, inay sa pagtugkas sa kamatuoran sa mga anomaliya. Apan kay wa man tay laing kapilian, makapasalamat na lang sa hilom nga wa siya sa pikas nakapusta.

* * *

Umaabot ang mas dakong salida—ang impeachment trial ni Ombudsman Merceditas Gutierrez. Mirisi sa iyang pagpakauwaw sa iyang buhatan, sa iyang pagyaka sa mga kasong pagpangawkaw ug sa iyang pagpagamit sa kukhan nga mga padrino. Seguro siyang ma-impeach sa House. Nga mosangpot sa naandang linigwatay sa Senado.

Ang pagdili sa pagkomentaryo ug pagpa-interview sa senator-judges dakong hilas-hilas. Ang impeachment usa ka politikanhong proseso nga kasagaran mohatag og mas dakong importansiya sa numero kay sa mga ebidensiya. Mao nga bisan unsa kalig-on sa mga ebidensiya sa pagbudhi ni Gutierrez sa pagsalig sa katawhan sa iyang buhatan, paabota ang mga senador nga alyado ni kanhi presidente Gloria Arroyo, nga maoy labing panington og bugbog kon mapalagpot si Gutierrez, nga maoy magdupadupa sa sinumbong.

* * *

Email: [email protected]