Sunod nga hepe

Di pa andam si Gobernador Gwen Garcia nga mopahibawo kinsay iyang ganahan nga molingkod nga sunod nga hepe sa Cebu Provincial Police Office (CPPO). Bisan may giduso na siyang ngan ngadto sa Philippine National Police (PNP) nga iyang gipanghinaot nga maapil sa listahan sa lima ka nominees nga himuon sa Senior Officers Placement and Promotions Board (SOPPB) sa Camp Crame.

Bisan sa kamakauuwaw sa pagkatangtang ni Koronel Erson Digal sa CPPO, daghan lang gihapon ang mangandoy nga makahupot sa labing taas nga katungdanan sa kapolisan sa lalawigan sa Sugbo. Way makabasol nila nga manghinaot nga nalilian ni Garcia ang ilang katakos pagpangu sa CPPO.

***

Kay may napilian na man si Garcia, nagduda ko modawat pa ba siya og mga aplikasyon pagka hepe sa CPPO. Apan kun ang napilian ni Garcia di maapil sa listahan sa SOPPB, makaangkon pa og bag-ong paglaom ang ubang nangambisyon.

Mao tingali nga usa nila, nga mahimong wa nay mapuslanon nga mahimo, nangutana nako unsay mga kalidad nga gipangita ni Garcia sa sunod nga hepe sa CPPO. Ambot diing langoba siya nagpuyo nga nagtuo man nga suhito ko sa panghunahuna ni Garcia. Apan klarong wa motuo sa mga kalidad nga gipahibawo ni Garcia sa media. Maong mangahas ko pagtubag sa iyang pakisayod.

***

Sa akong tan-aw, ang mga aplikante pagka hepe sa CPPO makapalambo sa ilang kahigayonan nga matudlo kun hingpit nga dawaton ang kamatuoran nga may mga tawo nga di ganahan og kumpetinsiya. Mao nga madani nilang pagtagad ni Garcia kun maghupot sa mosunod nga mga mithi:

Di sila magsige og paletrato, ni magtangkil og mga sakop sa media, ni mag-apil-apil sa bisan unsa na lang nga kontrobersiya;

Wa sila mabuang sa Facebook kay kuyaw nga may FB account nga malabwan ang gidaghanon sa friends; ug

Di sila magsige og pakaon ug painom sa mga sakop sa media, labi na kon ang kuwarta maggikan sa ilang kaugalingong bolsa.

***

Angay hinuong pasidan-an ang mga nangambisyon sa CPPO nga dako ang kahigayonan nga maapil sila sa listahan sa mga kaaway si Garcia. Nga maoy gidangatan nilang Koronel Vic Loot ug Digal. Managlahi hinuon ang mga hinungdan sa ilang kapalaran:

Si Digal gipasanginlan ni Garcia nga namakak sa nabulilyasong imbestigasyon sa pagdagit ug pagpatay ni Ellah Joy Pique nga nisangpot sa pagkasikop nilang Sven Erik Berger ug Karen Esdrelon; samtang

Si Loot naangin sa away nilang Garcia ug sa iyang asawang si Daanbantayan Mayor Malou Loot, nga human pasanginli ni Garcia nga “baga og nawong” nisumbalik nga mas ngil-ad ang “pekeng nawong.”

Maong mopaapas ko og laing sugyot sa mga aplikante sa CPPO: Kinahanglan nga wa sila’y asawa ni paryente nga mopalit og mga istoryang dubok. 

***

Email: [email protected]