Klaro nga imbestigasyon

Gidayeg nako ang kadagkoan sa Bureau of Immigration (BI)-7 nga abtik kaayong mipugong sa usa ka langyaw ug sa iyang hinigugma nga mosakay na unta og abyon.

Ang rason kay ang ilang dagway giingon nga mitukma kini sa cartographic sketch niadtong mga midagit ug mipatay sa sayes-anyos nga si Ellah Joy Pique nga taga Minglanilla.

Matud ni BI-7 regional director Casimiro Madarang nga miabag ra sila sa kapolisan aron masulbad ang pagpatay sa bata kay gihatagan man sila og kopya sa cartographic sketch sa mga abductors ug mitukma man kuno.

Akong klarohon nga nalipay ko nga may suspetsado na nga napik-ap ang mga tinugyanan sa balaod angay’ng lig-onon g’yud nila ang ilang ebidensya kay mora’g dakong lantugi ang nagpaabot sa unahan.

Sigurado nga ang pagpugong sa mga Immigration officers nga ang maong langyaw nga si Sven Erik Berger, taga Oslo, Norway, ug Karen Castro Esdrelon, taga Tuburan, nga makabiya luwan sa abyon paingon sa Hong Kong mosangpot og dakong kumbati sa hukmanan.

Kinahanglan g’yud unta nga bisan og may mga tawo nga mitumbok sa langyaw nga mao kadtong mi-abduct sa bata, angay nga suportahan pa gayud kini og mga circumstantial evidences.

Ibutang nato nga mamatud-an sa kapolisan nga ang sakyanan nga gigamit-gamit sa langyaw ug ni Esdrelon sa pag-estar nila dinhi sa dakbayan matumbok g’yud sa mga saksi nga maoy gigamit sa mga abductors.

May report man gud nga ang mga saksi kuno mitug-an human sa pag-abduct sa bata nga may patik sa bukton kadtong mipik-ap ni Ellah Joy. Unya kay kining taga Norway wala man.

Kuyaw g’yud kay basin og mapriso lang hinoon og makonbikto kini si Berger nga dili g’yud mao ang nagdagit ug nagpatay sa bata mahimong magkatawa ra ang tinuod nga kriminal?

Kon mahitabo nga may makonbikto pagdagit ug pagpatay sa bata apan dili siya mao ang tinuod nga kriminal, unya moabot ang higayon nga mahibaw-an na ang tinuod nga mamumuno dili na gayud kini mapasakaan og kaso tungod sa double jeopardy rule.

Mao kini ang angay’ng matngonan sa kapolisan. Busa ayaw kaayo ninyo dali-dalia ang pag-imbestigar tungod lang kay mauwaw kamo sa publiko nga dugay’ng nakasulbad sa krimen.

Matud sa panultihon nga mas maayo pa nga buhian ninyo ang daghang akusado kay sa makapapriso kamo og usa ka inosente nga tawo.

* * *

Wala gayud masayop si Mayor Michael Rama nga mikuha ni broadcaster Carlo Duga-duga isip public information officer sa dakbayan sa Sugbo.

Dili kini pag-ulog-ulog ang akong pagdayeg ni Carlo. Matag adlaw, mag-andam na gayud siya og mga department heads nga iyang ipaatubang sa mga sakop sa media aron sukit-sukiton sa mga isyu kabahin sa ilang opisina.

Butang kini nga wala mahimo sa ubang public information officers. Salamat kaayo sa imong “initiatives” Sir Carlo. Lahi g’ytud lagi kon ang kuhaon nga PIO dunay kasinatian sa media.

Sila si Jaybee Binghay sa Department of Social Welfare and Development (DSWD)-7 ug si Noel Rafols sa National Statistics Office (NSO)-7 maayo usab kaayo sa ilang katungdanan.

Ang uban gud nga mga PIO dili kaayo makahatag og tukma nga tubag kon pangutan-on sa media. Ang uban usab mahadlok nga may media nga buot mointerview kanila.

Pastilan, kon ako’y PIO ganahan kaayo ko nga may media nga mointerview, apan kinahanglan lagi nga magtoon mo’s sa isyu sa tagsa-tagsa ninyo ka mga opisina o ahensya.

* * *

Gikalipay kaayo ni Mayor Michael Rama ang gihimo nako nga pag-report kaniya kabahin sa mga traffic enforcers nga magtanga lang ug dili mobadlong o manakop sa mga drayber nga makahimo’g sayop sa pagmaneho’g sakyanan.

Ugma atuol sa tigum sa CITOM Board paatubangon na kadtong traffic enforcer nga nadestino sa Gorordo Avenue nga nagtan-aw lang nga miagi sa iyang tungod ang usa ka PUJ nga wala magpasiga sa suga alas 6:30 sa gabii sa miaging semana.

Kon kini nga matang sa traffic enforcer ang magdaghan, kadaghan kaha nga mga drayber ang dili na mopasiga sa ilang suga.

Baya usab kining ubang drayber uy. Ubos ra kaayo ang ilang panabot nga kon magpasiga kuno sila sa ilang headlight o tail light, makalas kuno ang ilang gasolina.

Pun-an pa sa ubang mga tag-iya sa PUJ nga maayo lang modawat sa abangan nga wala gani magtan-aw sa nagkagidlay na nilang sakyanan, samot!

* * *

Email: [email protected]