Patas g'yud unta

Kon imong hunahunaon kining mga tawo nga nagtukod og mga balay daplin sa kasapaan nakahimo sila og salaod, labaw sa tanan nakahatag og kakuyaw ngadto sa ubang tawo.

Abi ninyo og ngano? Ang lapad nga mga sapa gihimo nila nga gamay pinaagi sa pagmugna og mga ripraps aron gikan sa tampi sa sapa molapad ang ilang balay.

Resulta, nahimong gamay na lang kaayo ang sapa ug ang tubig-baha kon dunay kusog nga uwan moawas na ngadto sa karsada og sa ubang dapit. Unya, angayan ba sila nga premyohan sa ilang gihimo?

Pabor ko sa argumento ni kanhi konsehal ug karon CITOM chairman Sylvan “Jack” Jakosalem nga dili na angay’ng mogasto ang dakbayan sa Sugbo og minilyon ka pesos aron ipabawon aning mga tawhana.

Sayonan ka, imbes motabang sila’g hawan sa sapa kay anaa man sila magpuyo, ang ilang mga sagbot anaa ra gihapon nila gilabay sa sapa. Mao kini ang rason nga dili sila angay’ng premyohan.

Kon husto ang banabana sa hepe sa Division for the Welfare of Urban Poor (DWUP) nga labing minus 3,000 ka pamilya ang namuyo daplin ug diha mismo sa kasapaan ning dakbayan, sa ato pa P15 milyones ang gasto paghatag og hinabang kanila.

Lain pa nga problema, sigurado na ba g’yud kaha nga kon ang maong mga pamilya mapapahawa gikan sa ilang gipuy-an wala nay laing motukod og balay diha?

Basin og mahisama ra unya sa paggasto sa dakbayan kaniadto og libo-libo ka pesos nga kwarta aron ang mga nagpuyo sa aseras mopauli na sa ilang dapit sa probinsya, apan hangtod karon naa lang gihapon.

Sa laktod, pulos lang pagpangkwarta ug pagpasiatab ang gihimo. Gausik-usik lang sa kwarta nga gikan sa buhis sa katawhan.

* * *

Ang buot nako ipangutana mao nga kinsa may angay’ng mabasol nga kining maong mga pamilya nakatukod og balay diha sa sapa ug daplin sa kasapaan?

Duna man g’yuy mga opisyal ani ba nga angay’ng basulon kay natulog ra sa ilang trabaho. Unya, kon panggub-on man gani nato ang mga illegal structures nga iya sa mga kabus, apilon usab nato ang iya sa mga dato.

Dili man makiangayon nga ang pobre ra ang atong himoan sa pagpatuman sa balaod, apan ang mga kwartahan mopiyong ra ang atong mga mata.

Kaklaro ana nga kon anha ka magtindog sa Mahiga Bridge sa Banilad, unya modung-aw ka sa tampi sa sapa, ang usa ka dakong balay-patigayon milapas na ngadto sa sapa.

Ang riprap sa sapa kon dugtungon nimo sa unahan tul-id, apan ang sapa miliko tungod sa maong gimugna nga riprap sa balay-patigayon nga gipaabot ngadto sa sapa.

Bisan si Mayor Mike Rama nakabantay niini sa among pag-inspection sa maong dapit kaniadtong miaging semana, apan wala usab motataw unsay iyang buhaton.

Si Vice Mayor Joy Augustus Young nga akong gipangutana niini kagahapon wala usab makahatag og tukma nga tubag unsaon kining maong pag-ukopar sa balay-patigayon ngadto sa sapa.

Ngano, maayo lang diay kita sa mga pobre? Mao man bitaw kini ang rason nga kon kami sa LTO Task Force Alpha manakop og mga makasala nga drayber, bisan dato akong dakpon.

Ang tumong nako mao nga walay pili-pili ang pagpatuman sa balaod kay kon may pagpinig, unya pilion ra ang mga pobre, sigurado ko nga magmahay sila.

* * *

Unsa ba kining usa ka photo shop diha sa SM City nga nanawat og repair sa mga camera nga wala may klaro sa ilang serbisyo.

Awhagon nako ang tagdumala niining maong photo shop nga ayuhon nila ang ilang serbisyo kay “backlight” ra sa camera ang depekto, apan hangtod karon wala nila maayo.

Ingon ba niana ang matang sa inyong pagserbisyo? Kon magsige nga ingon niini ang inyong serbisyo, mapugos ko pagbutyag sa katawhan unsa kamo nga matang nga moserbisyo sa inyong kliyente.

Nagpatuga-tuga baya mo’g dawat og repair nga wala man diay kaha mo’y technicians, ipasa pa man ninyo og lain, sa laktod sub-contract.

Tiaw mo, pagdawat ninyo sa camera gamay ra ang gitug-an ninyo nga kadaot, apan may lain na usab nga inyong gipasangil?

Kuyawan ko nga moabot ang higayon nga ang kinatibuk-ang camera ang mailisan o kaha modako pa ang kadaot. Pagka karon, gipugngan usa nako ang ngalan sa inyong photo shop aron paghatag og higayon nga magtarong mo.

***

Email: [email protected]